Қазақстанда наурыздан бастап қоқыс тастағандарды әкімдік те жазалайды

Фото: pexels.com

Қазақстанда наурыз айынан бастап қоғамдық орынды ластағандар мен абаттандыру ережесін бұзғандарды әкімдік өкілдері де жауапқа тарта алады. Бұған дейін мұндай құзырет тек полицияда болған. Бұл туралы Stan.kz ақпарат агенттігі Информбюро бағдарламасына сілтеме жасап хабарлайды.

Наурыздан бастап көшеге қоқыс тастап, қоғамдық мүлікті бүлдіргендерге тек полиция емес, әкімдік қызметкерлері де айыппұл сала алады. Экология министрлігі жергілікті билік өкілдеріне әкімшілік хаттама толтыру құзыретін берді. Енді абаттандыру ережесін бұзғандар шенеуніктердің де бақылауына ілігеді.

Экология және табиғи ресурстар министрлігінің басқарма басшысы Нұрлан Белқайыровтың айтуынша, абаттандыру ережесін сақтамағандарға әкімдіктегілер бірден хаттама толтырып, айыппұлды өзі сала алады. Ал қоқыс тастағандарға сот шешімі арқылы шара қабылдайды. Одан бөлек, жауапқа тарту құқығы шенеуніктердің бәріне бірдей берілмейді.

Әкімнің өздері шешеді қандай құрылымдық басқармалар айналысатынын. Біздің білуімізше тұрмыстық, коммуналдық басқармалар болады. Осындай абаттандыру мәселесімен айналысатын. 

Ал қала тұрғындары тәртіп пен тазалықтың сақталғаны дұрыс дейді. Алайда бұдан кейін айыппұлдардың саны көбейе түспей ме деп алаңдайды. 

"Бір жағынан бұл бақылау тым артық сияқты. Әкімдіктің қандай құқығы бар? Ол атқарушы орган, жазалаушы орган емес", "Дұрыс, әкімдік бақыласын. Көрсе, байқаса, арнайы маманын жіберсін", "Айыппұл салғанша, алдымен қоқыс жәшіктерін көбейткен дұрыс сияқты", – деді тұрғындар.

Ортақ пайдаланатын орынды ластау, яғни қоқыс тастағандарға 43 мың теңгеден астам айыппұл немесе 40 сағат жұмыс жазасы көзделген. Ал ағаш сындыру, рұқсатсыз кесу сияқты әрекеттермен абаттандыру ережесін бұзғандарға 86 мың 500 теңге айыппұл қарастырылған.

• "Осыған алты ай кетті": Алматылықтар Достық даңғылындағы жөндеу сапасына шағымданды

• "Шұңқырға төгіп, үстін жауып тастайды": Алматы облысында Lay’s зауытының құрылыс алаңына қоқыс көмгені түсірілген видео тарады

Еске салайық, бұған дейін әлемдегі танымал таулы туристік бағыттарда қоқыс мәселесі ушығып бара жатқанын жазған едік. Әсіресе Эверест, Килиманджаро және Альпі таулары сияқты көп адам баратын шыңдарда қалдықтарды жинау мен тасымалдау үлкен проблемаға айналған. Биік таудағы төмен температура мен мұздықтардың қозғалысы пластик, металл және тұрмыстық қалдықтардың ондаған жыл бойы ыдырамауына себеп болады.