Қостанайда бірінші сыныпқа баратын оқушының анасы баласын мектепке тіркеп үлгермей қалды
Қазақстанда бірінші сыныпқа баратын оқушылардың ата-аналары мектеп жетпейтінін айтып шағымданды. 1 сәуір күні Egov порталымен балаларын мектепке тіркемек болған ата-аналар орын толып кетіп, үлгермей қалғанын айтты. Бұл туралы Stan.kz ақпарат агенттігі 31-арнаның Информбюро жаңалықтар қызметіне сілтеме жасап хабарлайды.
Фото: Ru.freepik.com
Татьяна Деревянко баласын Қостанайдың халқы тығыз қоныстанған ауданындағы мектепке орналастыру үшін таңнан бастап онлайн өтінім бермек болған. Алайда қанша тырысса да үлгермей қалды.
“Біраз уақыттан кейін өтініштерді мектептерде қағаз жүзінде қабылдайтыны хабарланды. Алайда кешкі беске дейін мектептерде комиссия болған жоқ. Біз өтінім бергіміз келген мектепте комиссия болмады. Бестен кейін тек сол шағын аумаққа жататын ата-аналардан ғана өтініш қабылдады. Біз квота бойынша өтініш бермек болдық, бірақ оны қабылдамайды екен”, – дейді Татьяна Деревянко.
Қостанайда бірінші сыныпқа үш баланы шағын аумақтан, біреуін квота арқылы қабылдайды. Көптеген ата-аналардың баласын гимназия немесе лицейге тұрғылықты мекенжайына қарамастан орналастырмақ болғандықтан өтініш беру кезінде дүрбелең шыққан.
“Қалалық көпбейінді гимназия, физика-математика лицейі, №24 гимназия сияқты мектептерде өткен жылдан бастап қабылдау тестілеусіз, жалпы негізде жүргізіліп келеді. Сондықтан ата-аналар алғашқы күннен бастап өтінім беріп жатыр. Себебі бұл мектептерде сыныптар бір күнде толып қалады”, – дейді Қостанай әкімдігі жалпы орта білім беруді дамыту секторының жетекшісі Жанар Батталова.
Осылайша гимназияға олардың тіркеу аймағына жататын балалардың өзі түсе алмай жатыр. Мысалы, Қостанайдағы Горький атындағы мектеп-гимназиясы бір күнде бірінші сыныпқа 100 оқушы қабылдап қойды. Орын толып кетті. Ата-аналар онлайн қабылдау кезінде барлығының мүмкіндігі тең екенін айтады. Бірақ құжаттарды офлайн қабылдау кезінде ата-аналар пара береді деп алаңдайды.
Қазақстанда 1 сәуірден бастап бірінші сыныпқа құжат қабылдау басталады
Цифрлық даму министрі кеше Egov порталына бір уақытта миллионнан астам сұраныс түскенін, сол себепті жүйенің істен шыққанын түсіндірді.
“Мен адамдардың қандай жағдайға тап болғанын түсініп тұрмын. Бірақ біз бұл техникалық мәселелерді шешуге жедел кірістік. Тіпті қызметкерлер жүйені қалыпқа келтіру үшін жұмыс орнында түнеді”, – деді Жаслан Мәдиев.
Министрлік балалардың құжаты 31 тамызға дейін қабылданатынын мәлімдеді.
Бұған дейін Цифрлық даму министрлігі eGov-тың жаппай істен шығуына көп қолданушы жаппай мектепке қабылдау туралы өтініш бергені себеп болғанын түсіндірген еді.