Қазақстанда алаяқтар енді банк карталарын клиенттің атынан бұғаттай бастады

Фото: admmegion.ru

Қазақстандықтарға алаяқтықтың жаңа схемасы туралы ескертілді. Бұл жолы қаскөйлер банк карталарын клиенттің атынан өздері бұғаттайды. Одан кейін "көмектесу" сылтауымен байланысқа шығады. Сарапшылардың айтуынша, схеманың қауіптілігі алғашқы кезеңде банк тарапынан жасалған заңды әрекет сияқты көрініп, күдік тудырмайды. Бұл туралы Stan.kz ақпарат агенттігі Информбюро бағдарламасына сілтеме жасап хабарлайды.

Алаяқтар банк карталарын бұғаттауды үйренген. Олар банкке қоңырау шалып, өзін карта иесі ретінде таныстырып, картаны бұғаттауды сұрайды. Ал карта иесіне қаржы ұйымынан ресми хабарлама келеді. 

Адам абдырап қалған сәтте, алаяқтар көп ұзамай қайта хабарласып, өздерін банк қауіпсіздік қызметінің немесе құқық қорғау органдарының қызметкерлері ретінде таныстырады.

Datastar компаниясының басқарушы директоры, QAZTECH альянсының ақпараттық қауіпсіздік комитетінің тең төрағасы Евгений Питолин алаяқтар не сұрайтынын айтып берді.

"Осы сәтте қаражатты "қорғау", жеке тұлғаны "растау", ақшаны "қауіпсіз шотқа аудару" деген желеумен бопсалау сценарийі іске қосылады. Олар сізден ресми деректерді сұрайды. PIN-кодты, картаның артқы жағындағы CVV-кодты, SMS арқылы келетін кодтарды талап етеді", – деді Евгений Питолин.

Мамандардың айтуынша, карта нөмірі, аты-жөні және адамның ЖСН-і (ИИН) болған жағдайда, қаскөйлер оның шотын қашықтан-ақ оңай бұғаттай алады. 

Киберқауіпсіздік саласының сарапшысы Калилалло Байтасов ашық қолжетімділікте реквизиттерін жариялайтын танымал тұлғалар мен ұйымдар ерекше қауіп аймағында екенін айтты.

"Бұл, мүмкін, қайырымдылық қорлары, көмек көрсету үшін қаражат жинайтын ұйымдар болуы мүмкін. Мен бірнеше YouTube-блогердің донат бағдарламасын жариялағаннан кейін, олардың электронды әмияндары бұғатталған жағдайларды білемін. Егер картаңыз бұғатталғаннан кейін "мәселе бар" деген мазмұнда қоңырау түссе, әңгімені дереу тоқтату керек. Содан кейін банктің ресми колл-орталығына өзіңіз хабарласып, жеке тұлғаңызды растап, картаны қайта ашу қажет. Сондай-ақ алаяқтық әрекет туралы міндетті түрде хабарлау маңызды", – деді киберқауіпсіздік мамандары.

• Төсбелгі сатып алмақ болған қазақстандық мұғалімдер алаяққа алданып қалды
• Бас прокуратура алаяқтар WhatsApp аккаунтыңызды қалай бұзып алуы мүмкін екенін ескертті

Еске салайық, бұған дейін телефон арқылы жасалатын алаяқтықтың жаңа түрі белең алғанын жазған едік. Қаскөйлер жәбірленушілерді "тыныш жерге бар" деп, дауыс арқылы гипноздап, банктік кодтарды немесе несие рәсімдеуді сұрайды. Соның салдарынан азаматтар миллиондап шығынға батуда. Мамандар гипноздың қашықтан дауыс арқылы да жасалатынын растаған. Үкімет бұған жауап ретінде несиені бірден рәсімдеуге тыйым салатын "бір күн ойлану" мерзімін енгізіп, SIM-карталарды жаппай алмастырудың жолын кесетін жаңа шектеулерді іске қосты.