Қазақстан футбол федерациясының экс-президенті Барменқұловқа қатысты іс қозғалмаған
Қаржылық мониторинг агенттігі төрағасының орынбасары Жеңіс Елемесов Қазақстан футбол федерациясының экс-президенті Әділет Барменқұловтың қылмыстық істе күдікті деп танылмағанын айтты. Бұл туралы Stan.kz ақпарат агенттігі хабарлайды.
Фото: kff.kz
Қаржылық мониторинг агенттігі ҚФФ бұрынғы басшылығына қатысты тергеу жүргізіп жатыр. Дегенмен Елемесов Барменқұловтың бұл істе күдікті деп танылмағанын мәлімдеді.
“Барменқұловты біз күдікті деп танымадық, айып тағылған жоқ”, – деді Жеңіс Елемесов сенат кулуарында.
Еске салайық, бұған дейін Қаржы мониторингі агенттігі Қазақстан футбол федерациясының бұрынғы басшылығына қатысты сотқа дейінгі тергеу бастағанын хабарлаған.
Кейін Бас прокуратура Қазақстан футбол федерациясы мен бірнеше футбол клубтар арасында жүргізілген прокурорлық тексеру нәтижесінде тиімсіз басқару кесірінен 3 миллиард теңге залал келтірген қаржылық заң бұзушылықтарды анықтағанын мәлімдеді.
Негізгі заң бұзушылықтар қатарына негізсіз сыйақы төлемдері, инфрақұрылымдық нысандарды салу кезінде қаражатты мақсатсыз жұмсау, ойыншылармен жасалған күмәнді мәмілелер, сондай-ақ спортшыларға арналған тамақтандыру қаражатын жымқыру жағдайлары орын алған.