Қазақстан азаматы Қырғызстанда "синтетика" таратты деген күдікпен ұсталды

Фото: Қырғызстан ҰҚМ

Қырғызстанда Қазақстан Республикасының азаматы синтетикалық есірткі таратты деген күдікпен ұсталды. Одан жалпы салмағы 5 келі болатын "Альфа-ПВП" есірткі заты тәркіленген. Бұл туралы Stan.kz ақпарат агенттігі хабарлайды.

Қырғыз Республикасының ұлттық қауіпсіздік мемлекеттік комитетінің мәліметіне сенсек, Қырғызстанда 8 ақпанда Қазақстан Республикасының азаматы ұсталды. Одан 5 келі "Альфа-ПВП" атты синтетикалық есірткі заты табылған.

"Қырғыз Республикасының Қылмыстық кодексінің 282-бабы 3-бөлігі бойынша көзделген қылмыс белгілері аясында жүргізілген сотқа дейінгі іс жүргізу барысында Қырғызстан аумағына синтетикалық есірткі жеткізу арнасының жолы кесілген. 2026 жылғы 8 ақпанда жүргізілген жедел-тергеу шаралары нәтижесінде Қазақстан Республикасының азаматы жалпы салмағы 5 келі болатын “Альфа-ПВП” синтетикалық есірткісімен ұсталды", – делінген хабарламада.

Күдікті Қырғыз Республикасының ұлттық қауіпсіздік мемлекеттік комитетінің тергеу изоляторына қамалды. Қазіргі уақытта есірткі жеткізу арнасын ұйымдастырушыларды анықтауға бағытталған тергеу амалдары жалғасып жатыр.

• Таиландттан келген сәлемдеме үшін жасөспірімге ақша төлеген: Қазақстандық студент табыс табамын деп 15 жылға сотталып кетті

• Алматыдағы түнгі клубта аспаз есірткі саудасымен айналысты деген күдікпен ұсталды

Еске салайық, бұған дейін Қарағандыда "StroyKz09" лақап атымен белгілі онлайн-дүкенге жұмыс істеген күдіктілер ұсталса, бір күн бұрын Астанада полицейлер 3 келіге жуық марихуананы жоюға әрекеттенген азаматты қолға түсірген еді. Құқық қорғау органдары синтетикалық және өсімдік тектес есірткілердің заңсыз айналымын анықтау бағытындағы жұмыстарды жалғастырып жатыр.