Қайрат Сатыбалдыдан тәркіленген Kaisar Plaza аукционға қойылды

Фото: Яндекс

Қайтарылған активтерді басқару компаниясы Қайрат Сатыбалдыұлынан мемлекетке тәркіленген Kaisar Plaza бизнес орталығын аукционға қойды. Бұл туралы Stan.kz ақпарат хабарлайды.

Sauda.e-qazyna.kz мемлекеттік мүлік тізілімінің веб-сайтында Kaisar Plaza сауда орталығының бастапқы бағасы 61,5 миллиард теңге деп көрсетілген. Кепілдік жарнасы 9,2 миллиард теңге деп белгіленді. 2024 жылы Қайрат Сатыбалды "Қазақтелеком" АҚ-да жымқырғаны үшін алған бас бостандығынан айыру жазасын жеңілдету үшін ғимаратты мемлекетке берді.

Тоғыз қабатты бизнес орталығы Алматыда Желтоқсан көшесінде орналасқан. Ғимаратта әртүрлі жалдау шарттарымен 53 жалға алушы бар. Жалпы ауданы 63,9 шаршы метр деп көрсетілген, бірақ бұл көрсеткіш нақты емес.

• Қайрат Сатыбалды Алматы қаласындағы Есентай өзенінің бойында орналасқан қонақүйді мемлекетке сыйға тартты
• Қайрат Сатыбалдының ұлына тиесілі болған "Байсат" базарының үлесі қайтадан аукционға қойылды

"Ғимараттың аумағында сәйкессіздіктер бар. Жылжымайтын мүлікке тіркелген құқықтар туралы куәлікте және оның техникалық сипаттамаларында аумақ 63 920 шаршы метр делінген, ал техникалық төлқұжаттың көшірмесінде 56 480 шаршы метр деп көрсетілген. Бұл сәйкессіздік ауданы 2 297 шаршы метр болатын панорамалық қабаттың шын мәнінде шатыр болғанына және жалпы аумаққа кірмейтініне байланысты. Сондай-ақ аумақтарды қайта өлшеу және қайта есептеу салдарынан жалпы аумақ 5 143 шаршы метрге азайды", –делінген лоттың сипаттамасында.

Аукцион 7 сәуірде өтеді. Өтінімдерді қабылдау сағат 9:55-те аяқталады.

Еске салайық, бұған дейін Қайрат Сатыбалдының ұлына қатысты сотқа дейінгі тергеу амалдары аясында биыл ақпан айында бюджетке тағы да шамамен 82,6 миллиард теңге (185 миллион доллар) түскенін жазған едік.