Қайрат Нұртасты жақсы көретін жапон қызы қазақ әндерін нақышына келтіре шырқайды (видео)

Жапон қызы Мидзуки Накамура кішкентайынан шетел әндеріне құмартып өсіпті. Өсе келе қазақ әндеріне ғашық болған ол, бірден үйренуге кіріскен. “Ақбақай” әні қазақ мәдениетіне деген махаббатымды оятты” дейді ол.

Бұл туралы el.kz хабарлайды.

23 жастағы Мидзуки “Желсіз түнде жарық ай”, “Қамажай”, “Құсни-Қорлан”, “Ақ жайнақ”, “Арыс жағасында” сияқты бірталай әндерді нақышына келтіре шырқайды.

“Қазақ әндерін алғаш тыңдағанымда, Қазақстанның таңғажайып ән мен күйдің отаны екенін түсіндім. Мектеп бітірген соң, Цукуба университетіне оқуға түстім. Университетте ТМД елдерінен келген студенттер, магистранттар көп. Олармен достасып, 1 курстан бастап орыс тілін үйрендім. Қазақстандық достарыммен бірге ән айттық, биледік. Қазақ халқының ұлттық тағамы – етті де астық. Қазақтар – өте қонақжай, ашық халық”, дейді әнші қыз.

Қазақ жастарымен араласу арқылы ол ерекше әсер алып, ол қазақ халқын, дәстүрін, мәдениетін тіпті жақсы көріп кеткен.

“Эстрада, халық әні, попса жанрындағы барлық әндерді ғаламтор арқылы тыңдап жүремін. Ал әншілерден Қайрат Нұртас пен КешYOU тобының әндері ұнайды”, – дейді ол.

Өнерлі қыз қазір Цукуба университетінде магистратурада “лингвистика және Орталық Азия бойынша аймақтану” мамандығында оқиды. Бірнеше жылдан бері Орта Азиядағы тіл саясаты, оның ішінде татар тілінің жағдайы туралы зерттеп келеді. Сондай-ақ, ағылшын, орыс, татар және өзбек тілдерін жақсы меңгеріпті. “Сонымен бірге, башқұрт, қазақ, ұйғыр, түрік, тәжік тілдерін де жақсы түсінемін. Қазір қытай, кәріс, парсы тілдеріне қызығып жүрмін” дейді Мидзуки.

Әнші қыз келесі жылы Қазақстанға келуді де жоспарлап отыр.

Ая Өміртай.

Оқи отырыңыз:

Саят Медеуов: Қызым біреуге тоқал боламын десе, қарсы емеспін

Майғазиев: Қоғамда бір түндік жас қыздар көп

Қазақ эстрадасындағы киіну стилін өзгертпейтін жұлдыздар

Ұлықпан Жолдасов өзін рушыл санайтын тыңдармандарына жауап берді