"Қатарласы итеріп, басын унитазға соғып алған": Атырауда "Тағылым" жекеменшік мектебінің оқушысы жарақат алып, тергеу басталды

Фото: freepik.com

Атыраудағы “Тағылым” жекеменшік мектебінің оқушысы жарақат алып, тергеу басталды. Отбасы бұл оқиға туралы кешке бір-ақ білген. Себебі білім ордасында мұғалімдер істі жасыруға тырысып, оқушылардан үндемеуді сұраған. Бұл туралы Stan.kz ақпарат агенттігі хабарлайды. 

Аталған жағдай әлеуметтік желіде хабарланды. 11-сынып оқушысы әпкесінің айтуынша, сіңлісі дәретханада басын унитазға соғып, ауыр жарақат алған. Жарияланған фотодан қыздың басы таңғышпен оралғанын және қан іздерін көруге болады. 

Қыздың әпкесінің сөзінше, мектеп қызметкерлері қанның іздерін жуып, оқушылардан ешкімге ештеңе айтпауды сұраған. Ол қыздың өзінен де, сыныптастарына да үндемеуді талап еткен. Ал зардап шеккен оқушы алғашында отбасына жай ғана тайып құлағанын айтқан. Кейін шын мәнінде жанжал кезінде қатарластарының оны итеріп жібергенін мойындаған.

Скрин: Threads

Туыстарының айтуынша, мектеп күндіз ата-аналарға хабар бермеген. Оқушының сынып жетекшісі де, әкімшілік те болған оқиға немесе баланың жағдайы туралы ешқандай ақпарат бермеген. Отбасы оқиға туралы сол кеште сыныптасының анасынан білген.

Әпкесі қыздың әдетте ашық, мектептегі оқиғаларды жасырмай айтып жүретінін, ал бұл жолы тұйықталып, ештеңе айтқысы келмегенін жеткізді. Тіпті біреулердің оған “үндеме” деп тапсырғанын аңғарғанын айтты. 

Атырау облысының білім басқармасы мектепте тараптар мен куәгерлер қатысатын ішкі тергеу басталғанын хабарлады. Ведомство мәліметінше, мектеп қызметкерлері “дұрыс және жедел әрекет еткен”.

Басқарма өкілдері мектеп қызметкерлері оқушыға алғашқы медициналық көмек көрсетіп, оны бірден дәрігерге апаруды талап еткенін айтты. Олардың айтуынша, қыз тек ағасымен бірге жедел жәрдем бөліміне баратынын айтып, бас тартқан. 

Ведомство мәліметінше, мектеп қауіпсіздік шараларын күшейтіп, мұндай жағдай қайталанбас үшін қосымша жұмыстар атқарып жатыр.

Полиция қылмыстық іс қозғады

Атырау облыстық полиция департаментінің мәліметінше, аталған факт бойынша қылмыстық іс қозғалды.

“Қазір күдікті анықталды. Оның заңды өкілдерінің қатысуымен тергеу жүріп жатыр. Оқиғаның барлық мән-жайын анықтау үшін қажетті тергеу әрекеттері жүргізілуде. Оқиға туралы құқық қорғау органдарына дер кезінде хабарламағаны үшін сынып жетекшісі мен мектеп директорының іс материалдары Атырау облысы бойынша білім сапасын бақылау департаментіне жіберіледі", – деләінген хабарламада. 

Департамент мәліметінше, қылмыс жасаған кәмелетке толмаған жасөспірім ішкі істер органдарында тіркелген. Ал оған қарсы жиналған материалдар кәмелетке толмағандар істері жөніндегі комиссияда қаралады.