Каратэшілеріміз Азия чемпионатында топ жарды
Қазақстан құрамасы Қытайдың Ханчжоу қаласында каратэден ересектер арасындағы Азия чемпионатында екі алтын медаль жеңіп алды. Бұл туралы Stan.kz ақпарат агенттігі хабарлайды.
Фото: Спортты дамыту дирекциясы
Қытайдың Ханчжоу қаласында WKF каратэден өткен ересектер арасындағы Азия чемпионатында қазақстандық спортшылар 2 алтын, 2 күміс және 1 қола медаль жеңіп алды. Кумите бағдарламасы бойынша ел намысын қорғаған 19 отандасымыдың екеуі алтынға, екеуі күміске қол жеткізсе, Токио олимпиадасының қола жүлдегері Софья Берульцева (+68 кг) қола медаль иегері атанды. Ал алтынды Жоламан Биғабыл (-55 кг) мен Нұрқанат Әжіқанов (-75 кг) жеңіп алды. Жоламан финалда иорданиялық Омар Шакраны жеңсе, Нұрқанат өзбекстандық Кувончбек Мухаммадиевтің мысын басты. Сондай-ақ ақтық сынға шыққан Әсел Қанай (-61 кг) күміс жүлде иеленді. Одан бөлек, ерлер командасы кумитеден 2-орын алды.
Айта кетейік, Биылғы сары құрлық додасына 30 елден ең таңдаулы 300-ден астам спортшы қатысып, өзара мықтыларды анықтады. Қазақстан жалпы есепте Жапония мен Вьетнамнан кейінгі 3-орынға тұрақтап, жарыс нәтижесі бойынша ерлер командасы әлем кубогына жолдама алды.
