Қанын сатады: Шығыс Қазақстан облысында маралдың мүйізін кесіп, азаптағандар жұрттың жағасын ұстатты

Желіде маралдың мүйізін кесіп, қанын стақанға құйып алған бір топ адамның бейнежазбасы дау тудырды. Зообелсенділер жануарды азаптаған бизнес өкілдерін жазалауды сұрайды. Бұл туралы Stan.kz ақпарат агенттігі хабарлайды. 

Өскеменде маралдың қанын стақанға құйып сататындар зообелсенділердің жағасын ұстатты. Айтуларынша, тұрғындар мұны емдік мақсатта қолданады. 

“Олар маралды қорқытып ұстап, содан кейін атпен қуып, арқанмен тартып, қинайды. Екі жағынан оны арнайы станокпен қысады да, аяғын теуіп жібермейтіндей қылып қояды. Содан кейін мүйізін ашықтан-ашық кеседі. Яғни бас терісін жұлып алады. Ауырсынғаны сонша – марал дірілдеп тұр, бірақ  қозғала алмайды. Ол не болып жатқанын түсінбейді. Ал адамдар басқаны азаптап, өздеріне расталмаған шипа іздейді. Марал қиналып, жылап жатқанда, олар содан ләззат алады”, – деді белсенді Тамара Головина.

Ол шенеуніктерден жануарды азаптайтын бизнеске тоқтау салуды сұрайды. 

Шығыс Қазақстан облысының полиция департаменті мұнда құқықбұзушылық әрекеттер жоқ екенін айтты.

“Аталған факті бойынша полиция қызметкерлері "Жанат" ШҚ-да жануарларды ұстауға, яғни маралдарды ұстауға және олардың өнімдерін одан әрі сатуға рұқсат беру құжаттарының бар-жоғына тексеру жүргізді. 

Катонқарағай ауданының ветеринария бөлімі берген өндіріс объектісіне есептік нөмір беру туралы растауға сәйкес, онда жануарлардан алынатын өнімдер мен шикізатты қайта өңдеу жөніндегі қызметті жүзеге асыруға рұқсат бар.  Олардың әрекеттерінде қылмыстық немесе әкімшілік құқық бұзушылық құрамы қарастырылмайды”, – деді ПД баспасөз қызметі.