Қаңғыбас иттер жаңа туған сәбиді ауруханадан алып кетіп, талап өлтірген
Үндістанның Харьяна штатындағы Панипат қаласында қаңғыбас иттер жаңа туған баланы ауруханадан ұрлап, талап өлтірген, деп хабарлайды Stan.kz ақпарат агенттігі.
Қала тұрғыны Шабнам ауруханаға жеткізіліп, ұлды болды. Күйеуі Аас Мохаммад та босану кезінде жұбайының жанынан табылған. Осыдан кейін жас ана аурухананың бірінші қабатындағы жалпы палатаға ауыстырылды. Оның жанына күйеуі, қайын енесі және тәтесі қонған. Әйелдің өзінен басқа барлық отбасы мүшелері палатаның еденінде ұйықтаған. Баланы тамақтандырғаннан кейін, әпкесі оны еденге қойып, жанына жатқызған.
Алайда түнде отбасы мүшелерінің бірі оянып, баланың жоқ екенін байқайды. Ол қалғандарын оятып, барлығы жаңа туған нәрестені ауруханадан іздей бастаған. Ақыр соңында олар көшеге шығып, баланы қаңғыбас иттердің аузынан тапты. Иттер оны аурухана бөлмесінен ұрлап әкетіп, талағаны белгілі болды.
Туыстары баланы бірден ауруханаға жеткізген. Алайда дәрігерлер жаңа туған нәрестенің қайтыс болғанын айтты. Баланың денесі сараптамаға жіберілді. Отбасы мүшелері ауруханада қауіпсіздік қамтамасыз етілмегеніне наразылық танытқан.