"Голан жоталары – Израильдің ажырамас бөлігі": Израиль премьер-министрі Сириядағы шиеліністен кейін аймақты өз бақылауына алды

Израиль премьер-министрі Биньямин Нетаньяху Голан төбелері Израильде қала беретінін айтты. Бұл туралы Stan.kz ақпарат агенттігі хабарлайды.

Фото: Jalaa MAREY

Ол баспасөз конференциясында Голан төбелерін Израильдің ажырамас бөлігі деп атады. 

"Голан жотасын бақылау бізге қауіпсіздікті қамтамасыз етеді. Голан мәңгілікке Израильдің ажырамас бөлігі болып қала береді", – деді ол.

Нетаньяху Башар Асад билігінің аяқталуы ЦАХАЛ-дың Ливандағы Хезболла қозғалысы мен Иранға жасаған шабуылдарының тікелей салдары деп мәлімдеді.

"Біз Таяу Шығыстың келбетін өзгертеміз. Енді басқа Сирияны көргіміз келеді және бейбіт өмір сүргісі келетіндерге қол созғымыз келеді", – деді Израиль басшысы.

Башар Асад кеткеннен кейін Израиль Голан биіктеріндегі қорғанысын белсенді түрде күшейте бастады.

Израиль премьер-министрі әскеріне демаркациялық аймақты және оны бақылайтын позицияларды басып алу туралы бұйрық берді.

Голан төбелері 1967 жылға дейін Сирияның бір бөлігі болды. Алты күндік соғыс кезінде бұл аумақты израильдік әскерилер басып алды, ал “Қиямет” соғысынан кейін (1973) тараптар бітімге келу және әскерлерді бөлу туралы келісімге келді. 1974 жылы Голан биіктерінде БҰҰ бітімгершілік бекеттері пайда болды. Сирия жағындағы шекара сызығы "Браво" деп аталады, ал Израиль жағында "Альфа" деп тұрады.

Еске салайық, бұған дейін "Хайят Тахрир аш-Шам" содырлар тобы Сирия президенті Башар Асадтың елден кеткенін және Дамаск астанасын басып алғанын мәлімдеді. Дамасктегі көтерілісшілер мемлекеттік телеарна эфирінде жеңіске жеткендерін жариялады. Сириялық содырлар мемлекеттік телеарна мен Дамаск радиосы арқылы эфирге шығып, президент Башар Асад режимін құлатқандарын және саяси тұтқындарды босатқанын хабарлады. 

Осыдан кейін Израиль Голан жоталарындағы буферлік аймаққа басып кіріпті.