Жасанды ұрықтандыру клиникасының кесіренен бөтен баланы дүниеге әкелген отбасы орталықты сотқа берді
Флорида штатындағы ерлі-зайыпты дүниеге бөтен баланы әкелгеннен кейін жасанды ұрықтандыру клиникасын сотқа берді. Бұл туралы Stan.kz ақпарат агенттігі Dailymail.co.uk-ға сілтеме жасап хабарлайды.
Тиффани Скор мен Стивен Миллс балалы болатынын білген сәтте шексіз қуанышқа бөленген. Шамамен бес жыл бұрын олар IVF Life компаниясына экстракорпоральды ұрықтандыру (ЭКО) арқылы бала сүю үшін жүгінген.
Бұл әйелдің жұмыртқа жасушасы мен ер адамның ұрығын оның денесінен тыс жерде ұрықтандыру. Кейін эмбриондар ата-ана сәбилі болуға шешім қабылдағанға дейін мұздатып сақталады. Скор мен Миллс жағдайында әйелге эмбрионды салу сәуір айында жүзеге асқан.
Тоғыз айдан кейін олардың отбасында қыз бала дүниеге келген. Алайда көп ұзамай олар Лонгвуд қаласында Орландо репродуктивті медицина орталығы ретінде жұмыс істейтін IVF Life клиникасы өрескел қателік жіберген болуы мүмкін деп күмәндана бастаған.
News6 мәліметінше, Скор мен Миллстің екеуі де ақ нәсілді. Алайда клиникаға қарсы берілген талап-арызда баланың “еуропалық нәсілге тән емес келбеті бар” екені көрсетілген.
Болжамды заңбұзушылықтар АҚШ-тың Флорида штатындағы Лонгвуд қаласында орналасқан Орландо репродуктивтік медицина орталығында болған. Фото: WKMG
Шындықты анықтауға бел буған жұп генетикалық сараптама жасатқан. Нәтижесінде баланың олардың биологиялық перзенті емес екені расталған.
Олар 22 қаңтарда сотқа жүгінген. Айтуларынша, бұған дейін клиникамен бірнеше рет байланыс орнатуға тырысқанымен, жауап ала алмаған.
“Олар бұл баланы шын жүректен жақсы көріп қалды. Олар бұл баланы өсіру мүмкіндігіне қуанар еді. Бірақ бұл өздеріне бөтен бала екені және кез келген сәтте біреулер келіп, сәбиді алып кетуі мүмкін деген алаңдаушылық бар”, – деді жұптың адвокаттарының бірі Джек Скарола Orlando Sentinel басылымына.
Скор мен Миллс клиникада сақтаулы тұрған үш ұрықтандырылған жұмыртқаның біреуі қателікпен басқа адамға имплантацияланған болуы мүмкін деп те қауіптенеді.
Олар клиникадан Скордың баласы дүниеге келерден бір жыл бұрын осы мекемеде эмбриондары сақталған барлық өзге клиентке болған жағдай туралы хабарлауды талап етті.
Сонымен қатар кейінгі бес жылда IVF Life қызметі арқылы дүниеге келген әрбір балаға генетикалық тестілеуді клиниканың өзі қаржыландыруын қалайды.
Талап-арызда олар клиникада қалған эмбриондар туралы толық ақпарат беруді де сұрап отырғаны көрсетілген.
Абдырап отырған ата-ана News6-қа берген мәлімдемесінде өздерінің “кішкентай қызын жақсы көретінін” алға тартты. Егер қаласа, оны тәрбиелеуге мүмкіндіктері бар екенін де айтты.
“Оны біз өзіміз тәрбиелеуді жалғастыра аламыз деп үміттенеміз және баланы бізден тартып алмайтынына сенімді болғымыз келеді. Сонымен қатар біз оның биологиялық ата-аналарын тауып, хабардар ету – біздің моральдық міндетіміз екенін түсінеміз. Өйткені оның мүддесі үшін биологиялық ата-анасына өз баласын тәрбиелеу мүмкіндігі берілуге тиіс”, – деді олар.
Доктор Милтон МакНикол Скор мен Миллс ЭКО әдісімен ем алу үшін жүгінген клиниканы басқарады.
Отбасының өкілі бұл шулы оқиғаға қатысты тергеу жалғасып жатқанын мәлімдеді.
“Клиниканың көмегі мен ынтымақтастығы болмағанына қарамастан, қазір жиналған деректерге сүйеніп, қызымызды оның биологиялық ата-анасымен табыстырып, өз биологиялық баламызды да таба аламыз деген үміт бар”, – деді олар.
Orlando Sentinel басылымының мәліметінше, талап-арызда IVF Life LLC компаниясы мен клиника басшысы доктор Милтон МакНиколдың аты аталған.
Орландо репродуктивті медицина орталығы өз сайтында Скор мен Миллс тап болған алаңдатарлық жағдайға қатысты ақпарат жариялаған. Онда компания “Клиенттердің біріне генетикалық тұрғыда бөтен баланың дүниеге келуіне әкелген қателіктің себебін анықтау үшін тергеумен белсенді түрде ынтымақтасып жатыр” деп мәлімдеген.
Алайда бұл хабарлама сәрсенбі күні өткен сот отырысынан кейін сайттан алынып тасталған.
Сот отырысы барысында судья клиникаға жұма күнге дейін қалыптасқан жағдай бойынша нақты іс-қимыл жоспарын ұсынуды міндеттеген.
Қолда бар мәліметтерге сәйкес, 2023 жылғы маусымда жүргізілген тексеріс кәсіпорында қауіпсіздік техникасы ережелерінің бірқатар бұзушылықтарын анықтаған. Фото: WKMG
2024 жылғы мамырда Флорида медициналық кеңесі 2023 жылғы маусымда жүргізілген тексеріс барысында бірқатар кемшілік анықталғаннан кейін МакНиколға сөгіс жариялаған.
Анықталған кемшіліктердің қатарында “қолданыстағы өнімділік стандарттарына сай келмейтін” жабдықтар, тәуекелдерді басқару бағдарламасының талаптарына сәйкес келмеу және кейбір дәрі-дәрмектердің болмауы көрсетілген.
Orlando Sentinel деректеріне сүйенсек, осы заңбұзушылықтар үшін оған 5 мың доллар көлемінде (2,5 миллион теңгеге жуық) айыппұл салынған.
Айта кетейік, бұған дейін Павел Дуров өзінен бала туғысы келетін әйелдерге ЭКО рәсімін төлеуге уәде бергені хабарланған еді.
