Депутаттар саны 145 болмақ: Тоқаев бір палаталы парламентті "Құрылтай" деп атауды ұсынды

Фото: Ақорда

Ұлттық құрылтай отырысында мемлекет басшысы Қасым-Жомарт Тоқаев жаңа бір палаталы парламентке қатысты ұсыныстар мен бекітілген өзгерістерді айтып берді. Бұл туралы Stan.kz ақпарат агенттігі хабарлайды.

Тоқаевтың сөзінше, жұмыс тобы барысында парламенттегі депутаттар санын 500-ге дейін көбейту ұсынылған. Бірақ соңғы шешімге сәйкес, бір палаталы парламентке 145 депутат 5 жылға сайланады. Сондай-ақ 8 комитеттен тұрады. Ал заң қабылдау процесі 3 кезеңнен тұрады.

Бұдан бөлек Конституциялық сот, Жоғары аудиторлық палата және Орталық сайлау комиссиясы мүшелерін тағайындау енді бірыңғай парламент депутаттарының келісімімен жүзеге асырылмақ.

Аталған бастама билік тармақтары арасындағы өкілеттіктерді қайта бөлуге және судьялар мен мемлекеттік органдар мүшелерін тағайындауда парламенттің рөлін күшейтуге бағытталған.

Сәйкесінше бұл қазіргі қолданыстағы жүйеден бас тартуды білдіреді. Қазір аталған өкілет мәжіліс, сенат және президент арасында бөлінген. Ұсынылып отырған өзгерістерге сәйкес, тағайындау рәсімі бірыңғай парламент арқылы келісілетін ортақ тәртіпке көшіріледі.

Ұсынылған реформа аясында парламент депутаттарына президенттің ұсынуымен Жоғарғы соттың барлық судьяларын бекіту құқығын беру көзделіп отыр. Қазіргі кезде бұл өкілеттік ішінара сенат арқылы жүзеге асырылады. Ал жаңа бастама сот жүйесіне парламенттік бақылауды одан әрі күшейтуді мақсат етеді.