“Қазақстанның жастары есірткінің жаңа түріне тап болды. Ол ресми түрде есірткілер тізімінде болмаса да, оның әсері нашақорлықтың алғашқы сатысы болуы мүмкін. Азот тотығы – медициналық процедураларда қолданылатын күшті заттардың тізіміне енгізілгеніне қарамастан, мейрамханаларда, барларда және түнгі клубтарда "күлкі тудыратын шариктер" деп аталып, танымал ойын-сауық құралына айналды”, – дейді ол.

Депутат келтірген дерекке сүйенсек, азот тотығын ұзақ уақыт бойы қолдану B12 дәруменінің тапшылығын тудырып, жүйке жүйесінің бұзылуына, аяқ-қолдың жансыздануына, сондай-ақ қозғалыс қабілетінің төмендеуіне алып келеді. Сондай-ақ бұл зат психикалық денсаулыққа және жүрек-қан тамыр жүйесіне кері әсер ететін көрінеді.

“Кейінгі бір жылда елімізде "күлкі тудыратын шариктерден" кейін есін жоғалтқан, ауыр жарақат алған және жол-көлік оқиғаларына түскен жастардың саны өсіп келеді. Елімізде бұл газдың заңсыз айналымы үшін нақты қылмыстық немесе әкімшілік жауапкершілік қарастырылмаған”, – деп атап өтті депутат.

Бұл ретте депутат үкімет басшысынан мына жайттарға назар аударуын сұрады:

Азот тотығының заңсыз айналымы үшін әкімшілік немесе қылмыстық жауапкершілікті белгілеу мақсатында Қазақстан Республикасының заңнамасына өзгерістер енгізу жөнінде ұстаным ұсынуды;
Осы заттың таралуы мен қолданылуын, сондай-ақ оны еркін сатудың шектеулерін бақылауды күшейтуді;
Құқық қорғау органдарына алдын ала шағым жасамай-ақ, күлетін газды заңсыз пайдалану мүмкін болатын мекемелерге тексеру жүргізу үшін қосымша өкілеттіктер беруді;
Жастар мен оқушылар арасында "күлетін газдың" медициналық емес мақсатта пайдаланудың зияны туралы профилактикалық және түсіндіру іс-шараларын жүргізуді сұраймын.

Талқылау