Денсаулық сақтау министрлігі маңғыстаулық мектеп оқушыларының жаппай улануын тексеріп жатыр
Денсаулық сақтау министрлігі Маңғыстау облысы Бейнеу ауданы Манаш жалпы білім беретін мектебінің 12 оқушысы тамақтан улану дерегі бойынша тергеу басталғанын хабарлады. Санитарлық-профилактикалық шаралар жүргізу туралы қаулы шығарылып, әкімдік жанынан штаб құрылды. Бұл туралы Stan.kz ақпарат агенттігі Astana TV арнасына сілтеме жасап хабарлайды.
Фото: mel.fm
Балалардың улануына байланысты Бейнеу ауданы полиция басқармасына, Маңғыстау облыстық полиция департаментіне, білім басқармасына, аудандық және облыстық прокуратураға хаттар жіберілді. Бейнеу ауданы полиция басқармасының хабарламасына сәйкес, мектеп асханасы мөрленіп, жабылды.
Тексеру барысында Маңғыстау облысы Ұлттық сараптама орталығы филиалының мамандары асханадан азық-түлік, су, дезинфекциялық құралдардан сынамалар алды және қызметкерлердің ішек инфекциясын тасымалдаушылығын тексерді. Сынама нәтижелері әзірге өңделіп жатыр.
Уланған жасөспірімдер амбулаторлық ем қабылдап, дәрігерлердің бақылауында. Олар ауруханаға түскен кезде жүрек айну, әлсіздік, іштің ауырсынуы, сұйық нәжіс сияқты шағымдарын білдірген. Қазіргі жағдайлары қанағаттанарлық деп бағаланып отыр.
Зардап шеккен оқушылардың ата-аналары аурудың себебін мектеп асханасындағы сапасыз тамақпен байланыстырады. Бұл асханада бастауыш сыныптың 417 оқушысы ыстық тамақпен қамтылған.
Еске салайық, бұған дейін Мұнайлы ауданында 460 баланың жаппай улануы бойынша мектеп асханасын жалға алушыға қатысты қылмыстық іс аяқталып, сотқа жолданған еді. Төрт әйел 20-40 АЕК (73 840 – 147 680 теңге) көлемінде айыппұл төлеуге міндеттелді. Маңғыстау облысы, Бесшоқы ауылындағы №8 мектептің бірінші сынып оқушыларының уланғаны туралы өткен жылдың қыркүйегінде белгілі болды. Іштің ауырсынуы мен құсу белгілерімен 460 бала сырқаттанып, көпшілігі ауруханаға түсті. Оқушылардың ата-аналары балалардың мектеп асханасындағы тамақтың сапасыз екеніне бірнеше рет шағымданғанын айтты.