Дана Уайт Power Slap турнирінде қазақстандық жігітке тәнті болды
Қазақстандық Закир Найманбаев UFC басшысы Дана Уайт ұйымдастырған Power Slap – шапалақ спорты лигасында сәтті дебют жасады. Бұл туралы Stan.kz ақпарат агенттігі хабарлайды.
Фото: instagram.com/powerslap
Найманбаев лигадағы тағы бір дебютант, даниялық Троэль Нильсенді нокаутқа түсірді. Закирдың қарсыласы екінші нокдауннан кейін орнынан тұра алмады.
Отандасымыздың бәсекесін тамашалаған лига басшысы Дана Уайт Instagram желісіндегі жеке парақшасында қазақстандыққа өз таңданысын білдірді.
Найманбаев – кәсіби спортта пауэрлифтингтен Азия чемпионы. Закир ерекше күштік трюктерімен көпшілікті таңғалдырып келеді. Ол иығына қой көтеріп отырып-тұрудан рекорд орнатты, және көлікті көтеріп, дөңгелегін ауыстырған.
Қазіргі уақытта Закир туған қаласы – Семейде тұрады. Ол дене шынықтыру пәнінің мұғалімі болып жұмыс істейді. Сондай-ақ шәкірт тәрбиелеумен қатар шағын бизнеспен айналысады (геологиялық қаптарды сату).
2020 жылы Найманбаев YouTube блогері Амиран Сардаровтың ("Дневник хача") ұйымдастырған "Битва пощечин" жарысына қатысып, Денис Вильдановпен тең түсті. Кейін Вильданов поп-ММА жұлдызына айналып, Power Slap лигасымен келісімшарт жасасқан.
