"Цитрамон" 300-ден 700 теңгеге дейін: Алматыда дәріханаларды тексерген зерттеушілерді дәрі-дәрмек бағасы таңғалдырды
«Тұтынушылардың ұлттық лигасы» Алматыдағы дәріханалардағы дәрі-дәрмек бағасын тексерді. Тексеріс нәтижесі зерттеушілерді таңғалдырды.
Бұл туралы Stan.kz ақпарат агенттігі inAlmaty.kz басылымына сілтеме жасап хабарлайды.
Тұтынушылардың құқығын қорғаумен айналысатын ұйым мамандары қаладағы ең ірі әрі танымал дәріханалардағы көп сұранысқа ие дәрілердің бағасын салыстырды.
Зерттеушілер өзін әлеуметтік деп көрсететін дәріханаларда өзгелеріне қарағанда баға қымбаттау екеніне таңғалды. Сонымен қатар қалада дәрі-дәрмектің орташа бағасы айтарлықтай жоғары екені анықталды. Мысалы, «Цитрамонның» бағасы 300 теңгеден басталып, 600-700 теңгеге дейін жетеді.
«Қаланың орталығындағы дәстүрлі түрде қымбат саналатын, қызмет көрсетуге баса назар аударылған дәріханаларда дәрі бағасы ең арзан болып шықты. Сонымен қатар сатылатын дәрі-дәрмектің сапасы да сауал туындатады. Мысалы, лидокаинді сатып алуда, оның 5 үлгісінің үшеуі елімізде тіркелмеген болып шықты. Яғни олардың құрамы мен сапасын тексеруге келмейді», - дейді ұйымның президенті Светлана Романовская.
«Тұтынушылардың ұлттық лигасы» өкілдері қала тұрғындарының азық-түлік тауарларына қарағанда, дәрі-дәрмекке жиі шағымданатынын айтады. Зерттеу нәтижелері ашық көрсетіліп, тиісті мемлекеттік органдарға ұсынылады.