Бұрынғы бас прокурор Қайрат Қожамжаровтың туған бауырына тиесілі компанияға айыппұл салынды

Фото: gov.kz

Қазақстанның бұрынғы бас прокуроры Қайрат Қожамжаровтың туған бауырына тиесілі компанияға Қазақстан темір жолы (ҚТЖ) компаниясының шағымы бойынша айыппұл салынды. Бұл туралы Stan.kz ақпарат агенттігі хабарлайды. 

Өткен жылдың соңында “ҚТЖ-Жолаушылар локомотивтері” компаниясы Дулат Қожамжаровқа тиесілі “High Industrial Lubricants & Liquids Corporation” ЖШС компаниясымен келісімшарт жасасқан. Компания 2025 жылдың 31 желтоқсанына дейін жалпы сомасы 504 миллион теңге дизель отынын жеткізуі керек болған, алайда компания өз міндеттерін толық орындамаған. 

“2025 жылдың 1 тамызында жеткізуші мемлекеттік органдардың тексерістері мен іс-шаралардың ағымдағы қызметке елеулі кедергі келтіретінін айтып, тапсырыс берушіге (ҚТЖ) қолданыстағы келісімшарттарды 2025 жылғы 1 тамыздан бастап тоқтату туралы өтініш жолдаған”, – делінген хабарламада. 

“ҚТЖ-Жолаушылар локомотивтері” компаниясы 46 миллион теңге авансты қайтаруды және келісімшарттың жалпы сомасының 10%-ы (50,4 миллион теңге) мөлшерінде айыппұл салуды талап етті. Сот арызданушының талабын қанағаттандыру туралы шешім қабылдады.

“High Industrial Lubricants & Liquids Corporation” ЖШС-нен “ҚТЖ-Жолаушылар локомотивтері” пайдасына 45 769 957 теңге авансты, 50 401 768 теңге айыппұлды және 2 885 152 теңге мемлекеттік баж төлемдерін өндіру туралы шешім қабылданды”, – делінген сот хабарламасында. 

Айта кетейік, Дулат Қожамжаров – кәсіпкер, Қазақстанның бұрынғы бас прокуроры Қайрат Қожамжаровтың бауыры. Ол “Hill Corporation” компаниясының жалғыз құрылтайшысы. 

Еске салсақ, бұған дейін Қазақстанның бұрынғы бас прокуроры, сенаттың экс-депутаты Қайрат Қожамжаровқа қатысты сотқа дейінгі тергеу басталғаны туралы жазған едік. Тергеу "басшылық қызметте болған әртүрлі кезеңдерінде қызмет бабын асыра пайдалану”, “қылмыстық жолмен алынған қаражатты заңдастыру” фактілері бойынша басталған.