Әйел бұрынғы күйеуінен қашып, басқа қалаға көшуге мәжбүр болған. Алайда бұрынғы күйеуі Көкшетаудан көшіп кеткеніне қарамастан, оны әлі де аңдып жүр. "НеМолчи" қорының мәліметінше, ер адам әйеліне және оның отбасына қоқан-лоқы көрсеткен, тіпті бір хабарламасында оны "бөлшектеп өлтіретінін" айтып қорқытқан.

Қазақстандық ер адам бұрынғы әйелін балалары 18 жасқа толғанша асырауға міндеттелді

Сонымен қатар, күдікті әйелінің ата-анасының көлігінің дөңгелектерін жарып, нөмірлерін жұлып тастаған. Сондай-ақ, автокөлік капотына және пәтер есіктеріне бейәдеп суреттер салған. Бейнебақылау камераларын талқандап, есікті монтаж көбігімен бітеп тастаған көрінеді.

Әлеуметтік желіде тараған бейнежазбада жәбірленуші ер адамның бірнеше ай бойы оны аңдып жүргенін айтады.

"5 желтоқсанда көлігіміз бен есігімізді бүлдірді, 5 қаңтарда тереземізді сындырды, 9 ақпанда пышақпен қорқытты, ал 22 және 28 наурызда тағы да бейәдеп суреттер қалдырып, бейнебақылау камераларын сындыруға тырысты", – дейді әйел.

Полиция департаменті әйел мен оның отбасы мүшелеріне жасалған қоқан-лоқы бойынша Қылмыстық кодекстің "Қоқан-лоқы жасау” бабы бойынша қылмыстық іс қозғалғанын мәлімдеді.

"Қазіргі таңда құқық бұзушыны ұстау және оны ішкі істер органдарына жеткізу шаралары жүргізілуде. Сондай-ақ, Көкшетау тұрғынының бұрынғы күйеуіне қатысты бұған дейінгі барлық шағымдары тіркелгенін хабарлаймыз. Олар бойынша тиісті тексерулер жүргізіліп, қажетті шаралар қабылданады", – деп хабарлады Ақмола облыстық полиция департаментінің баспасөз қызметі.

Еске салсақ, осыған дейін Атырау облысында ер адам бұрынғы әйелін жұмыс орнында өлтіріп кетті деген күдікке ілінгенін жазғанбыз.

Талқылау