"Бешикташ" футбол клубы Зайнутдиновсыз Еуропа лигасынан шығып қалды
Түркиялық “Бешикташ” футбол клубы Еуропа лигасы (УЕФА) топтық кезегінің сегізінші турында Нидерландының “Твенте” командасынан жеңіліп қалды. Бұл туралы Stan.kz ақпарат агенттігі хабарлайды.
Фото: официальный сайт “Бешикташ”
Бұл ойында “Бешикташтың” құрамында Қазақстан құрамасының жартылай қорғаушысы Бахтиер Зайнутдинов алаңға шыққан жоқ. Ол қосалқы құрамда қалды.
Голландияның Эндсхед қаласында өткен ойында “Твенте” клубы жеңіске жетті. Матчтағы жалғыз голды 76-минутта алаң иелерінің ойыншысы Дан Ротс соқты.
Осы жеңілістен кейін “Бешикташ” турнирлік кестеде тоғыз ұпаймен 28-орынға сырғыды. Нәтижесінде стамбулдық клуб Еуропа лигасының плей-офф кезеңіне өте алмады. Себебі, трофей үшін таласты ары қарай тек 24 команда жалғастырады. Осылайша “Бешикташ” бұл турнирдегі нашар нәтиже көрсеткен 12 команданың қатарында қалды.
Айта кетейік, “Бешикташтың” бас бапкерлігіне жақында ғана норвегиялық маман Оле Гуннар Сульшер келген еді. Ол бұл қызметте голландиялық Джованни ван Бронкхорстты алмастырды. Сульшер стамбулдық клубқа дейін англиялық “Манчестер Юнайтед” футбол клубын басқарған болатын.
