"Байқа! Алаяқ!" детективті комедиясы 19 наурыздан бастап прокатқа шығады
19 наурызда еліміздің барлық кинотеатрларында жаңа көркем туынды "Байқа! Алаяқ!" фильмінің көрсетілімі басталады. Режиссер Дархан Саркеновтің ("Қолыңнан келсе алып қаш") бұл туындысы маусымның басты комедиялық хиты ғана емес, сонымен қатар цифрлық қауіпсіздік пен ұрпақтар байланысын арқау еткен маңызды әлеуметтік жоба болмақ.
Картинаны New Era Films кинокомпаниясы Tolqyn Film Fund инвестициялық қорының (Dasco Capital басқаруымен) қолдауымен түсірді. Фильм дистрибьюторы – Ascar Cinema компаниясы.
Сюжет желісі бойынша басты кейіпкер (Жазира Еркін) киберқылмысқа қарсы күрес бөлімінің қызметкері. Ол күн сайын азаматтарды алаяқтардың құрығынан құтқарып жүрген нағыз кәсіби маман. Алайда, тағдырдың тәлкегімен оның өз ата-анасы (Қуандық Шәкіржанов пен Бақыт Әліпбаева) ірі алаяқтықтың құрбаны болады.
Отағасы балаларының үй алу үшін жинаған барлық қаражатынан бір сәтте айырылып қалады. Енді кейіпкерлер қылмыскерлерді тауып, жақындарының алдындағы кінә сезімі мен қорқынышты жеңуі керек.
Басты рөлді бүгінде танымалдылығының шыңында жүрген актриса Жазира Еркін сомдады. Табынушылары мен сыншылар актрисаның қазір нағыз "прайм-дәуірін" бастан кешіп жатқанын бір ауыздан айтады. Оның харизмасы мен кәсібилігі фильмге ерекше серпін береді.
"Байқа! Алаяқ!" фильмінде ол қатал киберпол офицерінен отбасы үшін бәріне дайын сүйікті қыз рөліне шебер түрленеді.
Көпшіліктің сүйіктілері Қуандық Шәкіржанов пен Бақыт Әліпбаеваның қатысуы картинаға ерекше атмосфера сыйлайды. Бұл актерлік дуэт бұған дейін-ақ шынайы қазақстандық киноның символына айналған. Олардың кейіпкерлері арқылы авторлар интернет-алаяқтық сияқты күрделі мәселелерді әзілмен де жеткізуге болатынын көрсетеді. Комедия жанры кездейсоқ таңдалған жоқ бұл қауіпсіздік ережелерін көрерменге ешқандай ақыл айтпай-ақ, жеңіл әрі қызықты етіп түсіндіруге мүмкіндік береді.
Кино туындының маркетингтік науқаны аясында "Стоп! Пирамида!" қоғамдық қорымен серіктестік орнатылды. Қормен бірлесіп халықтың қаржылық сауаттылығын арттыру бойынша ауқымды ақпараттық жұмыстар жүргізілуде. Осы ынтымақтастықтың арқасында "Байқа! Алаяқ!" жай ғана кино емес, қазақстандықтарды алаяқтардың айласын дер кезінде тануға және өз отбасын қорғауға үйрететін пайдалы жобаға айналды. 19 наурыздан бастап кинотеатрларда!
