“НеМолчи” қорына жағдайды хабарлаған Манзура Жетпісбаеваның сөзінше, демалыс аймағаның әкімшілігі бөлмелерді дезинфекцияламай адамдарды орналастырып жатыр екен.

"Ол жерде шілде айынан бері демалушылардың басым көпшілігі ауырып жатыр. Демалыс аймағының әкімшілері бұл жағдайдан хабардар бола тұра адамдарды қабылдауды жалғастырып жатыр. Олар бөлмелерді дезинфекцияламай, адамдарды орналастыруды жалғастырып отыр. Мен кеткеннен кейін бөлмені босаттым, ал 10 минуттан кейін жаңа жалға алушылар көшіп келді. Бұл бөлме дезинфекцияланбаған”, – деді астаналық Манзура Жетпісбаева.

Ал ерлі-зайыптылар Болат пен Анастасия Абдулғазиновтар "Досжан" отбасылық пансионатына екі күн тұрып, 160 мың теңге төлеген. Салдарынан бүкіл отбасының іші өтіп ауырған. Болат пен кенже ұлы Қарағандыдағы жұқпалы аурулар ауруханасынан 21 тамызда шығарылған. Оның айтуынша, отбасы мүшелерінің барлығы демалыстан қайтып келе жатқанда ауырып қалған.

“Асқазаным жол бойы ауырды. Үйіме әрең жеттім. Балалардың қызуы көтерілді. Бәрімізді ауруханаға апарды. Келесі күні інім Балқашқа кетті. Ол аймаққа барып көріпті. Пансионат әлі де жұмыс істеп тұр. Асхана сөз жүзінде жабық болғанымен, бірақ жұмыс істеп тұр екен. Жаппай улану оқиғасы орын алғанымен пансионатты карантинге жаппаған. Кейіннен ауруханада жатқан адамдардың басым көпшілігі “Досжан” отбасылық пансионатында уланғанын білдім. Тіпті қатты таңғалдым. Барлық науқас сол жерде уланған", – деді Болат Абдулғазинов

"Досжан" пансионатының клиенттері 15 тамыздан бастап Балқаш ауруханасына жаппай қарала бастаған. Одан кейін жергілікті санитарлық-эпидемиологиялық бақылау басқармасының қызметкерлері демалыс аймағына барған. Тексеру нәтижесінде пансионаттағы мейрамхана жабылды. Ресми мәлімет бойынша, жаппай уланудан 29 адам зардап шекті. Бірақ бұл медициналық көмекке жүгінгендер ғана.

"Қандай 29 адам?! Біздің тобымызда қазір 36 отбасы бар. Әрқайсында төрт адам болса, бұл кем дегенде 144 адам. Мұнда осынша адам бар. Егер бұл мәселені көтерсем саны әлдеқайда көп болады. Шамамен 200 адам", – деді Болат Абдулғазинов.

Жәбірленушілер пансионатты жабуды және оның басшылығын жазалауды талап етіп отыр.

16 тамызда полиция пансионаттағы жаппай улану дерегі бойынша қылмыстық іс қозғағанын хабарлады. Арада бес күн өткен соң облыстық санитарлық-эпидемиологиялық инспекциясы тергеу басталғаннан бері пансионаттың жаңа қонақтарды қабылдамағанын хабарлады. Алайда отбасылық пансионат кез келген уақытта ол жерге келіп, қоныстануға болаынын айтты. Демалыс аймағындағы асхана ашылмағанымен, "Досжан" қызметкерлері мұның себебін жасырып отыр.

"Бөлмелер бар, келіңдер. Бірақ әзірге тамақпен қамтамасыз ете алмаймыз. Себебі маусым аяқталды, ас үй жабық. Жақын жерде кафе, асхана, дүкендер бар. Сіз алдын ала төлем жасап, тапсырыс бере аласыз. Бос бөлмелер бар", – дейді пансионат қызметкері.

Бір күндік нөмірлер 50-ден 160 мың теңгеге дейін. Қонақтарға 20% жеңілдік және тамақ жетіспеушілігі үшін тағы 15% өтемақы уәде етілген.

Пансионат басшылығы ресми түсініктеме бермеген. Ал мемлекеттік санитарлық-эпидемиологиялық қадағалау департаменті жәбірленушілердің жаппай үндеуінен кейін ресми түсініктеме берді.

"Қарағанды облысының санитарлық-эпидемиологиялық бақылау департаменті жедел ішек инфекциясы туралы хабарламаны алғаннан кейін ішкі істер органдарымен бірге жүргізген тексеру аясында мамандар зертханалық зерттеу әдістерін қолдана отырып, тексеру жүргізгенін хабарлайды. Ішкі істер органдары мекеменің асханасын мөрмен бекітіп, жедел әрекет ету шараларын қолдану үшін зертханалық сынақ нәтижелерін күтіп отыр. Балқаш қаласының бас санитарлық дәрігерінің "Досжан" отбасылық пансионатының қызметіне тыйым салу бойынша жедел әрекет ету шараларын қабылдау туралы қаулысы шықты", –делінген хабарламада.

Талқылау