Су тасқынынан зардап шеккен оралдықтар Орақбаев 1Б мекенжайында орналасқан үйге 17 қыркүйекте көшіп келді. Олар пәтерлері адам төзгісіз суық екенін атап өтті. Балалар үйде бас киім мен күртеше киіп жүреді екен. Сол үшін үйде жылытқыш қосып отыруға мәжбүр.

“Тұрғын үй-коммуналдық шаруашылығы үйіміз баланста жоқ екенін айтып, құрылыс салушыға жіберді. Әзірлеуші күнде ертең деп келді. Барлығымыздың үш-төрт баламыз бар. Менің қызым бір айлық. Ол көрпеге оранып жатыр. Әр бөлмеде электр жылытқыштар бар. Олай болса, жылудың ақшасын өтеп берсін. 30-40 мың теңге болған шығар", – дейді үй тұрғыны Әсел Исеева.

Пәтер 59 отбасыға берілген. Тұрғындар пәтерлер дымқыл болып кеткенін айтады. Балалар ауырып, жөтеледі екен. Қазір жаңа ғимаратта жұмыс қызу жүріп жатыр, кіреберістердің үстіндегі шатырлар аяқталып, абаттандыру жұмыстары басталған

Орал қаласы әкімінің орынбасары Жандос Дүйсенғалиев бұл ғимараттың коммерциялық екенін, пәтерлердің бір бөлігі су тасқынынан зардап шеккендерге сатып алынғанын түсіндірді. Әзірлеуші – СВС Батыс ЖШС.

“Жартысы орналасты, қалған жартысы әлі бос, құрылыс салушы пәтерлерді сатқан жоқ. Бұл пәтерлерде қазандық жоқ және QazaqGaz Aimaq үйді газға қосудан бас тартып отыр, бұл адамдардың өміріне қауіпті. 21 қазанда біз басшылықпен сөйлестік, жақын арада бұл мәселені шешеміз", — деп түсіндірді Жандос Дүйсенғалиев.

Батыс Қазақстан облысының энергетика және тұрғын үй-коммуналдық шаруашылық басқармасының басшысы Мирас Мұлқай әлі сатылмаған пәтерлердің электр желісіне қосылатынын, содан кейін ғана газдың қосылатынын айтты. Олар пәтерлер сатылғанша күтпейді.

Айтпақшы, Оралда 1215 көпқабатты үй бар. Олардың барлығына жылу берілді, бірақ Гагарин 36/4 және Х.Доспанов 58А мекенжайларындағы екі үйде ақау туындады.

"Қазір бұл үйлерде басқару нысаны болмағандықтан және тұрғындар желілерді жөндеуге ақы төлейтіндіктен, жылу берілмейді. Бұл ретте ЖТЭ қызметкерлері тұрғындарға көмектесіп, еріп жүреді”, – деп түсіндірді Жандос Дүйсенғалиев.

Талқылау