Аймағамбетов білім мекемелерінде күзет қызметіне қойылатын талапты қатаңдатуды талап етті
Депутат Асхат Аймағамбетов оқу орнындағы күзет қызметіне қойылатын талапты қатаңдатуды талап етті. Сөзінше, бұрынғыдай жасы келген адамдардың отырғаны дұрыс емес. Бұл туралы Stan.kz ақпарат агенттігі хабарлайды.
Фото: Rg.ru
Асхат Аймағамбетов тендерді жеңіп алатын күзет ұйымдарының сапасына көңілі толмайды.
“Бірнеше жыл бұрын құқық қорғау органдарының бастамасымен мектептердегі вахтерлердің орнына кәсіби күзет ұйымдары енгізілді. Расында, жасы келген адамдар төтенше жағдайда дұрыс әрекет ете алмайды дедік.
"Вахтер" деген сөзді "күзетшіге" ауыстырдық, ал іс жүзінде көбіне — сол баяғы адамдар. Көп жағдайда — жасы алпыстан асқан апа-аталар. Кейде тіпті бұрынғы вахтерлерден де алшақ, мектептің ішкі өмірінен бейхабар”, – деді ол.
Сөзінше, күзет нашар болғанына қаражаттың аздығы себеп. Тендерді ең арзан баға ұсынған компания ұтады. Ал олар сәйкесінше дайындығы жоқ, жиі ауысатын, кейде бейресми түрде істейтін адамдарды алады дейді.
“Олар мұғалімдерді танымайды, мектеп режимін білмейді, оқушылармен қалай сөйлесу керек екенін де түсінбейді. Мектеп – жай ғана ғимарат емес, бұл — балаларымыздың екінші үйі. Ал оны қорғау — жай ғана "отыр" дей салатын жұмыс емес. Күзет ұйымдарына қойылатын талаптар да тым әлсіз. Жасына, денсаулығына, кәсіби дайындығына нақты талап жоқ. Құжатта бір адам көрсетіледі, ал іс жүзінде басқа адам жұмыс істеп жүреді. Ешкім тексермейді. Көбіне бір ғана күзет постына ақша бөлінеді. Ал мектепте мың жарым, кейде екі мың бала бар. Кіріп-шығатын 2–3 есік”, – деді депутат.
Ол ішкі істер министрлігіне бірнеше ұсыныс айтты:
- Күзет ұйымдарына қойылатын лицензиялық талаптарды күшейтуі керек – жасы, білімі, дайындығы нақты жазылуы қажет;
- Ел бойынша бірыңғай стандарт қабылдауға тиіс;
- Мектептің көлемі мен оқушы санына қарай күзет посттарының нақты нормативін бекітуі қажет;
- Сатып алу тетіктері жетілдірілуге тиіс.
Еске салсақ, елімізде енді мектеп пен балабақшалардағы күзетшілерге тексеріс жүргізілетіні айтылды.