Астана тұрғыны мен полицейлер қарт кісіні телефон алаяқтарынан құтқарып қалды
Фото: freepik.com
Астанада қала тұрғынының қырағылығы мен полицияның жедел әрекетінің арқасында егде жастағы ер адам телефон алаяқтарының арбауынан аман қалды. Бұл туралы Stan.kz ақпарат агенттігі хабарлайды.
Полицейлердің мәлімдеуінше, көшеде кетіп бара жатқан елордалық тұрғын қарияның телефон арқылы белгісіз біреулерге ақша жібермек болғанын байқап қалған. Алаяқтардан күдіктенген ол дереу полицияға хабар берген.
"Оқиға орнына жеткен полиция қызметкері Ұлықбек Жұмағұлов телефонның ар жағындағы алаяқтармен сөйлесіп, олардың әрекетін тоқтатты. Осылайша қала тұрғынының қырағылығы мен полицияның жедел әрекетінің арқасында телефон алаяқтарына тосқауыл қойылып, қарияға көмек көрсетілді", – делінген ішкі істер министрлігі таратқан хабарламада.
Жағдайды толық анықтау үшін қария полиция бөліміне жеткізілген. Ал оқиғаға бейжай қарамаған қала тұрғынына тәртіп сақшылары қырағылығы үшін алғыс білдірді.
Полицейлер мұндай жағдайда әңгімені дереу тоқтатып, полицияға хабарласу керек екенін ескертті.
"Эфирден қиып тастайды, концертке қатыстырмайды": Қазақстандық шоу-бизнес өкілдері хиджаб кигені үшін түрлі кемсітуге тап болған
