Елордалық клуб еурокубоктық бәсекені екінші кезеңнен бастады. Молдовалық "Зимбру" командасына қарсылас атанған отандастарымыз алғашқы матчты "Астана Арена" стадионында өткізді. Бұл ойында футбол мамандары қазақстандық клубты фаворит санады.

Астанада өткен ойынға 24 мыңнан аса жанкүйер жиналды. Еурокубоктық бәсекелерде шетел ойыншыларына көп үміт артатын бас бапкер Григорий Бабаян бұл жолы да жүрісінен жаңылмады. Алғашқы минуттарда шығатын 11 ойыншының қатарына "Астана" құрамындағы қалың қазақстандық ойыншылар ішінен тек қаптал қорғаушы Ян Вороговский ғана ілінді. Осылайша, елордалық бас командамыз осы маусымдағы еурокубоктық алғашқы матчын 10 легионермен бастады.

Букмекерлік кеңселер мен жасанды интеллект бұл матчқа алдын ала болжам жасағанда, қазақстандық клубты анық фаворит санаған еді. Алайда Астана алаңында молдовалықтар елге бекер келмегенін дәлелдеді. Бірінші кезең аяқталар тұста Ники Клещенкодан пас алған шабуылшы Гай Дахан Чондрич қорғаған қақпаға алыстан керемет соққы бағыттады. Өз қақпасына мұндай соққыны күтпеген хорват қақпашысы орнында қатты да қалды. Осылайша, алғашқы кезеңде 1:0 есебімен қонақтар алға шықты.

Үзілістен кейін астаналықтар ойынды белсенді бастады. Нәтижесінде, 55-минутта алаң иелері матчтағы алғашқы және жалғыз голын соқты. Елордалықтар сапында Иван Башич айып алаңының сыртынан қақпаны дәл көздеді. Есеп — 1:1.

Ойынның қалған бөлігінде қос команда қанша шабуылдаса да, қақпаға гол соға алмады. Осылайша, алғашқы матчта тең есеп тіркелді.

Қос команда арасындағы жауапты ойын 31 шілдеде Молдовада өтеді. Екі ойын нәтижесінде жеңіске жеткен команда Конференция Лигасының үшінші іріктеу кезеңіне жолдама алады.