"Астана" командасының Конференция лигасынан қанша қаржы тапқаны белгілі болды
"Астана" футбол клубы УЕФА Конференция лигасы аясындағы ойындары үшін қанша қаржы тапқаны белгілі болды. Бұл туралы Stan.kz ақпарат агенттігі хабарлайды.
Фото: Астана ФК
"Астана" футбол клубы УЕФА Конференция лигасының топтық кезеңіндегі ойындары аяқталып, плей-офф кезеңіне қатысатын командалар қатарынан шығып қалды. Конференция лигасының топтық кезеңінің әр қатысушысы 3 миллион 170 мың еуродан алған. Матчтағы жеңіс үшін – 400 мыңнан, тең ойын үшін 133 мың еуро қарастырылған. Елоардалық "Астана" бұл кезеңде сербиялық клуб "Бачка-Тополаны" жеңіп (1:0), португалиялық "Витория Гимарайншпен" (1:1) және кипрлік АПОЭЛ-мен (1:1) тең түсті. Осылайша "Астана" кем дегенде 3 миллион 836 мың еуро табыс тапса, соның ішінде 666 мыңы жеңіс пен тең ойындардан түскен бонустар болмақ.
Айта кетейік, "Астана" футбол клубы УЕФА Конференция лигасының жалпы кезеңінде 5 ұпай жинақтап, турнир кестесінің 28-орнына жайғасқан.