"Астана" баскетбол клубы 27 жеңілістен кейін жеңіске жетті
ВТБ Бірыңғай лигасында өнер көрсететін “Астана” баскетбол клубы осы маусымдағы алғашқы жеңістеріне қол жеткізді. Бұл туралы Stan.kz ақпарат агенттігі хабарлайды.
Фото: pbastana.kz
28-тур аясында “Астана” турнирлік кестеде өздерінен бір саты жоғары тұрған “Самара” баскетбол клубын 75:67 есебімен жеңді. Бұл – отандық клубтың маусымдағы алғашқы жеңісі. Соңғы рет команда 290 күн бұрын қарсыласынан басым түскен. Отандастарымыз 2024 жылдың 12 сәуірінде жеңіс тойын тойлаған еді. Айта кетейік, ол ойында да астаналық баскетболшылар дәл осы “Самараны” 94:92 ОТ есебімен ұтқан еді.
“Самара” баскетбол клубы қазір қаржылық қиындықтарға тап болған. Самара облысындағы бюджеттің тапшылығы баскетболға да өз зиянын тигізіп жатыр. Тіпті бұл команда маусымды аяқтай ала ма, әлде жоқ па, белгісіз. Себебі клубтың банкрот болғаны мәлім болды. Бұл ақпаратты команданың директоры Камо Погосян хабарлады.
Айта кетейік, елордалық клуб осыған дейін ВТБ Бірыңғай лигасында қатарынан 27 рет жеңілген еді. Қазір “Астана” турнирлік кестеде 12 команданың арасында соңғы орында келеді.
