Әнші Ернар Айдар Таразда жол үстінде видео түсіремін деп айыппұл арқалады
Әлеуметтік желілерде әнші Ернар Айдар түсірген видео тарады. Кейін танымал әртістің жол қозғалысы ережелерін өрескел бұзғанын полиция көріп, жауапқа тартты. Бұл туралы Stan.kz ақпарат агенттігі хабарлайды.
Көптеген қазақстандықтар видеодан әртісті оңай танығанын атап өтті. Олардың пікірінше, кадрларда әнші Ернар Айдар бейнеленген. Оның тек Instagram желісінде шамамен 2,8 миллион жазылушысы бар.Видеода ол өзінің қымбат көлігі мен көлік номерін көрсеткен.
Жамбыл облысы полиция департаменті видеоны мониторинг барысында анықтағанын хабарлады.
"Азамат А. әкімшілік құқық бұзушылық туралы кодекстің үш бірдей бабы бойынша әкімшілік жауапкершілікке тартылды. Көлік құралын тоқтату немесе қою қағидаларын бұзғаны, жол белгілері мен жолақ таңбаларының талаптарын сақтамағаны, сондай-ақ жолды белгіленбеген жерден өткені үшін құқық бұзушыға айыппұл салынды", – деп түсіндірді полиция департаменті.
Полиция өкілдері жол әзіл мен жарнамалық түсірілімдер жүргізетін орын емес екенін еске салды.
