Алматыдағы крематорий не себепті қолданысқа берілмей жатыр
Алматыдағы крематорийдің құрылысы 2021 жылы аяқталған. Алайда нысан әлі қолданысқа берілген жоқ. Алматы қаласы құрылыс басқармасы крематорийдің ресми түрде қашан ашылатыны туралы сұраққа жауап берді. Бұл туралы Stan.kz ақпарат агенттігі хабарлайды.
Фото: Stories.cgtneurope.tv
Алматы қаласы құрылыс басқармасының мәліметінше, қазір крематорий ведомствоның балансында.
“Мердігер ұйым "ТаразҚұрылысИнвест" құрылыс-монтаж жұмыстарын, соның ішінде инженерлік желілерді жүргізуді толық аяқтады. 2024 жылдың үшінші тоқсанында сәулет және әділет органдарында тіркеу жүргізілді. Қазір Алматы әкімдігі Әділет министрлігі мен Денсаулық сақтау министрлігіне нысанның түпкілікті баланс ұстаушысын анықтау туралы ресми хат жолдады”, – делінген хабарламада.
Нысанды пайдалануға беру туралы актіге қол қойылды. Алайда крематорийдің нақты қашан ашылатыны әзірге белгісіз.
Еске салайық, бұған дейін Алматыдағы крематорий құрылысы аяқталғанын және оның 2022 жылы мамыр айында іске қосылатыны туралы жазған едік. Алайда кейін нысанның ашылуы 2023 жылға қалдырылды.