Алматыда автобус пен жүк көлігі соқтығысты (видео)
Алматының Алатау ауданында автобус пен жүк көлік соқтығысты. Бұл туралы Stan.kz ақпарат агенттігі хабарлайды.
Фото: Видеодан скрин
Куәгерлердің айтуынша, жол апаты Шаңырақ-2 шағынауданында болған.
Аталған жайтқа қатысты Stan.kz тілшісі мәнжайды сұрап білді. Алматы қаласы полиция департаментінің мәліметінше, жол-көлік оқиғасы бүгін сағат 17:00 шамасында орын алған.
“Жүк көлігінің жүргізушісі Үшқоңыр көшесінің бойымен батыс бағытта артқа қарай жүріп бара жатқан. Осылайша Жанқожа батыр көшесімен солтүстікке қарай келе жатқан 45-ші бағыттағы қоғамдық көлікпен соқтығысқан. Жол-көлік оқиғасы салдарынан ешкім зардап шеккен жоқ”, – делінген хабарламада.
Алатау аудандық полиция басқармасының қызметкерлері жол-көлік оқиғасының мән-жайын анықтауға кіріскенін хабарлады.
Айта кетейік, бұған дейін Қарағанды полиция департаменті автобус көктайғақ салдарынан жаяу жүргіншіні қағып өлтіргенін мәлімдеген еді.