Прокуратура: Храпунов 2003 жылы Алматы әуежайының ғимаратын заңсыз беріп жіберген
Бұрынғы әкім Виктор Храпунов Алматы әуежайының ғимаратын жеке компанияға заңсыз сатып жіберген, деп хабарлайды Stan.kz ақпарат агенттігі.
Бұл туралы бас прокуратура мәлімдеді.
Министрлік Қазақстанға қаражатты қайтару жөніндегі ведомствоаралық комиссияның жұмысын үйлестіру аясында прокуратура органдары тәуелсіз талдаулар мен тексеру шараларын жүргізіп жатқанын хабарлады.
Атап айтқанда, заңсыз иеліктен шығарылған нысандарды, берілген жер телімдерін қайтару бойынша 13 талап-арыз берілді. Құны бес миллиард теңгені құрайтын заңсыз берілген немесе пайдаланылмай жатқан 140 мың гектардан астам жер телімдері қадағалау актілерімен қайтарылды.
Олигополиялардың пайдасына негізсіз шығарылған сот актілерінің күшін жоюға 23 наразылық берілді. Прокурорлық тексерулердің қорытындысы бойынша қылмыстық қудалау органдары әртүрлі теріс пайдалану, мемлекет мүлкі мен бюджет қаражатын ұрлау фактілері бойынша 12 сотқа дейінгі тергеу амалдарын бастады.
"Мәселен, олар Алматы халықаралық әуежайындағы дүкендер, барлар мен мейрамханалар аймағын заңсыз сату фактісін анықтады. Оларды 2003 жылы әкім Храпунов жеке компанияға заңсыз сатып жіберген. Сатылған аймақтың құны 333,7 млн теңгені құрады. Әуежай терминалының 1 601,1 шаршы метріне құқық белгілейтін құжаттарды заңсыз деп тану туралы сотқа талап-арыз бердік", - деді бас прокуратура.