Алматы әуежайында өзін-өзі өртеп жібермек болған ер адамның қазіргі жағдайы белгілі болды

Фото: видеодан скриншот

Дәрігерлер Алматы әуежайында өзіне өрт қойған ер адамның қазіргі жағдайынан хабардар етті – ол жансақтау бөлімінде жатыр. Ал көліктегі полиция департаменті бұл факт бойынша қылмыстық іс қозғалғанын мәлімдеді. Бұл туралы Stan.kz ақпарат агенттігі хабарлайды.

Қоғамдық денсаулық сақтау басқармасының мәліметінше, өзіне өрт қойған ер адам жедел жәрдеммен №4 қалалық клиникалық аурухағана жеткізіліп, жансақтау бөліміне жатқызылған. Оның жағдайы өте ауыр.

"Ол Денсаулық сақтау министрлігінің клиникалық хаттамасына сәйкес толық көлемде ем алып жатыр", – деп мәлімдеді ведомствоның баспасөз қызметі.

Көліктегі полиция департаменті өзін-өзі өртеу әрекеті фактісі бойынша қылмыстық іс қозғалғанын хабарлады.

"2025 жылғы 25 тамызда сағат 22:06-да Алматы әуежайының Т-1 терминалында билет кассасының жанында ер адам өзін-өзі өртеп жібермек болды. Полиция қызметкерлері әуежайдың қауіпсіздік қызметімен бірлесіп дереу қауіпсіздік шараларын қабылдады: өртті сөндіріп, жедел жәрдем шақырды. Ер адам қалалық ауруханаға жеткізілді. Көліктегі полиция департаменті бұл оқиға бойынша қылмыстық іс қозғады. Қазір тергеу амалдары жүргізіліп жатыр, оқиғаның себептері мен мән-жайлары анықталып жатыр", – делінген полиция хабарламасында.

Сондай-ақ оқиғаның болжамды себебі айтылды.

"Алдын-ала анықталғаны – бұл жайтқа ер адамның азаматтық некедегі әйелімен жанжалдасуы себеп болған. Оқиғаның барлық мән-жайы сотқа дейінгі тергеу барысында анықталады", – деп нақтылады полицейлер.

Еске салсақ, бұған дейін Алматы әуежайында ер адам өз-өзін өртеп жібергенін жазған едік. Әлеуметтік желіде тараған видеодан ер адамның әуежай кеңселерінің бірінде өзіне өрт қойғанын көруге болады.