Ақпарат министрі Аида Балаева референдумдағы азаматтардың белсенділігін атап өтті

Қазақстан Республикасы Премьер-министрінің орынбасары – Мәдениет және ақпарат министрі Аида Балаева елдің жаңа Конституциясын қабылдау жөніндегі жалпыұлттық референдумға қатысты. Бұл туралы Stan.kz ақпарат агенттігі хабарлайды. 

Дауыс беру Қазақстан Республикасының Ұлттық академиялық кітапханасында орналасқан №129 сайлау учаскесінде өтті. Министр бүгінгі оқиғаның саяси маңызын түсіндіре отырып, жаңа Конституцияны қабылдау елдің одан әрі дамуы жолындағы маңызды кезең екенін атап өтті.

"Әрбір ұлт, әрбір мемлекет өзінің болашақ даму жолын іздейді. Қазақстан да бұдан тыс емес. Халықтық Конституцияны қабылдау әділетті әрі прогрессивті Қазақстан құруды көздейді. Қазақстандықтар дұрыс таңдау жасайды деп үміттенемін", – деді А.Балаева.

Сонымен қатар Балаева референдум күні қазақстандықтардың азаматтық белсенділігі жоғары екенін атап өтті. Оның айтуынша, таңертеңнен бастап азаматтардың белсене қатысуы байқалған. Бұл елде ашық қоғамның қалыптасқанын, саяси мәдениеттің өсіп, азаматтардың мемлекеттің болашағына жауапкершілікпен қарайтынын көрсетеді.

"Таңертеңнен бастап ақпараттық кеңістікті бақылап отырмыз. Халықтың референдумға белсенді қатысып жатқаны қуантады. Қазақстанда ашық қоғам қалыптасқанын, саяси мәдениеттің жоғары екенін және азаматтық жауапкершіліктің айқын көрінетінін байқап отырмын. Бейжайлық жоқ, керісінше, елімізге деген саналы жауапкершілік бар. Бұл – мемлекет басшысының 2019 жылдан бері дәйекті түрде жүргізіп келе жатқан саяси реформаларының нақты нәтижесі деп ойлаймын", – деді вице-премьер.

Айта кетейік, дауыс беру учаскелері Астана уақыты бойынша сағат 7:00-ден 20:00-ге дейін жұмыс істейді.