Кейінірек бұл жазбаға Ақмола облысы сотының өкілі пікір қалдырып, қарт әйелге түзеу жұмыстары тағайындалды деген ақпаратты жоққа шығарды.
Ақмола облысының соты не дейді?
Ақмола облысы сотының баспасөз қызметінің мәліметінше, облыстық соттың алқасы жәбірленуші К-ның денсаулығына жеңіл зиян келтіру фактісі бойынша азаматша Ф-ға (89 жастағы әйелдің 72 жастағы жиені) және азаматша С-ға (89 жастағы әйел) қатысты қылмыстық істі қараған. Іс Қылмыстық кодекстің 108-1-бабының 2-бөлігінің 4-тармағы – “Денсаулыққа қасақана жеңіл зиян келтіру” бойынша қаралған.
Нәтижесінде бірінші сатыдағы соттың үкімімен Ф мен С 7 ай мерзімге бас бостандығын шектеу жазасына тартылып, олардың мінез-құлқына пробациялық бақылау белгіленген. Сондай-ақ сотталғандардан бірлесіп 130 мың теңге көлемінде материалдық шығын, 500 мың теңге моральдық зиянды өтеу және өкіл қызметіне жұмсалған 200 мың теңге шығын өндірілген.
Ақпаратқа сәйкес, Макинск қаласында 72 жастағы Ф өзінің 89 жастағы тәтесі С-ның үйінің кіреберісінде 89 жастағы әйелдің туысы К-мен кездесіп, оның қарт әжесіне қарызын қайтармағаны жөнінде наразылық білдірген. Шу шыққан соң пәтерден ер адамның жұбайы – азаматша К және қарт әйелдің өзі шыққан.
“Жәбірленуші К (ер адамның жұбайы – еск.) баспалдақта сүрініп, тізерлеп құлаған. Сол сәтте зейнеткердің жиені оны шашынан ұстап, 89 жастағы тәтесі С-мен бірге жұдырықпен басынан ұрған. Азаматша К ауруханаға жеткізіліп, оған “жабық бас-ми жарақаты, ми шайқалуы” диагнозы қойылды”, – деп хабарлады сот.
Сот отырысында қарт әйелдің жиені азамат К-ның 89 жастағы тәтесіне қарызын қайтармай жүргенін, жанжалдың себебі ақша болғанын айтқан.
“Ф мен С-ның (89 жастағы әйел – еск.) кінәсі жәбірленушінің дене жарақатын алғаны туралы арызымен, медициналық куәландыру және сараптама қорытындыларымен, жәбірленуші К-ның, оның жұбайының және куәгерлердің (көршілердің) көрсетулерімен, оқиға орнын қарау хаттамасымен дәлелденді. Алқа қаулысымен бірінші сатыдағы сот үкімі өзгеріссіз қалдырылды”, – делінген Ақмола облысы сотының баспасөз қызметінің хабарламасында.
Сот үкімі заңды күшіне енді.
