Ақмола облысында мектептегі жөндеу жұмысын жасап жүрген мұғалім жарақат алды
Фото: ЖИ
Щучинск қаласында №4 орта мектепте дене шынықтыру пәнінің мұғалімі мектептегі жөндеу жұмыстары кезінде жарақат алды. Бұл туралы Stan.kz ақпарат агенттігі хабарлайды.
Halyqstan Telegram арнасының мәліметінше, мұғалімдер спортзалдың киім ауыстыратын бөлмесін жөндеп жатқан. Дене шынықтыру пәнінің мұғалімі электр құралдармен жұмыс істеп жүрген. Бірде шарқайрақ қолынан шығып кетіп, айналып тұрған диск аяғына тиген. Мұғалімге оқиға орнында алғашқы медициналық көмек көрсетіліп, кейін ол жедел жәрдеммен ауруханаға жеткізілді.
Еске салайық, мемлекет басшысы Қасым-Жомарт Тоқаев “Педагог мәртебесі туралы” заңға ұстаз құқығын қорғау жөнінде өзгерістер енгізуді ұсынып, мұғалімдердің өз міндетінен тыс жұмыстардан босатылғанын айтқан еді.
Полиция департаменті аталған факті бойынша тергеу басталғанын мәлімдеді. Мектептегі оқыс жағдайға қатысты облыстық білім және ғылым қызметкерлерінің салалық кәсіподағы пікір білдірді.
“Мұндай жағдайларға жол беруге болмайды. “Педагог мәртебесі туралы” заң қатаң сақталуға тиіс. Мұғалімдерді кәсіби қызметіне қатысы жоқ жұмыстарға тарту – олардың құқығын бұзу. Кәсіподақ бұл оқиғаны өз бақылауына алады”, – делінген кәсіподақтың хабарламасында.
Әкімдік қаладағы ескі брусчаткалардың мұқтаж отбасыға берілгенін айтты: Алайда Боқаев төсеуіштің жеке қолға сатылып жатқанын түсіріп алған (видео)
