Ақтөбе облысында 99 жасөспірім қыз жүкті болып қалды
2025 жылы Ақтөбе облысында 99 жасөспірім қыздан жүктілік анықталды. Олардың көбі 17-18 жаста, алайда арасында жасы кіші мектеп оқушылары да бар. Бұл туралы Stan.kz ақпарат агенттігі “Диапазонға” сілтеме жасап хабарлайды.
Балалар гинекологы Салтанат Тубулбаеваның айтуынша, жақындары қыздардың жүкті екенін кеш байқаған.
“Бұл жаста іш бұлшықеттері жақсы дамыған, жастар кең киім киеді, ал жүрек айну мен құсуды асқазан мәселесіне жаба салуға болады. Көбіне мұндай қыздар бізге жүктіліктің 20-21 аптасында ғана келеді”, – дейді дәрігер.
Маманның сөзінше, жасөспірімдердің 98%-ы босанған. Дегенмен кейбір жағдайларда жүктілікті үзуге тура келген.
“Бұл шешім болашақ ананың және баланың денсаулығына байланысты медициналық немесе әлеуметтік көрсеткіштер бойынша қабылданады. Егер жүктілік мерзімі 21 аптадан асса, оны үзуге болмайды. Жасөспірімдердің әр жүктілігін акушер-гинекологтар, генетик, психолог және басқа да мамандардан тұратын комиссия қарайды. Қыздар қатаң бақылауда болады, өйткені бала көтеру жас организм үшін үлкен жүктеме. Олар физиологиялық тұрғыдан бұған толық дайын емес”, – дейді Салтанат Тубулбаева.
Маманның сөзінше, қыздардың 97-98%-ы балаларын алып қалады. Былтыр босанған жасөспірімдердің тек біреуінің ғана сәбиі “Үміт” сәбилер үйінде уақытша тәрбиеленіп жатыр. Қалған балалар өз отбасында өсіп жатыр.
Кейбір қыздардың анасы декреттік демалыс алып, балаға қарайды, ал қыздар оқуын жалғастырады. Ақтөбеде жүкті болған жасөспірімдердің көбі, негізінен, колледж студенттері, ал аудандарда мұндай жағдайлар сирек кездеседі. 17 жасқа келген қыздар үйленеді. Былтыр жүкті болған ең жас қыз 14 жаста болған.
Өткен жылы бір жасөспірім мерзімінен бұрын босанған. Жасөспірімдерді жоғары мамандандырылған үшінші деңгейлі клиникада босандырады, мұнда тек акушерлік қана емес, неонатология және реанимация қызметтері де бар.
Сонымен қатар кейбір зорлық-зомбылықтың салдарынан жүкті болған жасөспірімдер де бар.
“Зорлық көрсеткендер көбіне жақын туыстары – атасы, ағасы, ағайы, әкесі. Сондай-ақ жасөспірімдер көбіне үйде зорлық көреді. Қыздар бұл туралы бір жағынан қорыққаннан, екіншіден жақындарына сенгендіктен айтпайды, мұны қалыпты жағдай деп санайды. Көбіне зорлық-зомбылық бұрыннан бар отбасыларда кездеседі, мысалы, әкесі анасын ұруы мүмкін. Бұл менің 30 жыл бойғы бақылауымның нәтижесі”, – дейді Салтанат Тубулбаева.
Қазақстанда киіз үй бағасы 200 мыңнан 1,8 миллион теңгеге дейін: Оны кімдер сатып алады?
