“Ұлытау” тобының домбырашысы шаңырақ көтерді (фото, видео)
Қыдырәлі Болмановтың продюсерлік орталығында дүбірлі той. “Ұлытау” тобының белді мүшесі, домбырашы Рүстем отбасын құрып, дүркіретіп той жасады.
Бұл туралы Stan.kz хабарлайды.
Қуанышты хабарды халыққа Қыдырәлі Болманов жеткізді.
“Ұлытау” тобында үлкен той! Былтыр Америка еліне концерт беруге барған болатынбыз. ООН ұжымының алдында берген концертте Қазақстан сән үйлері қатысқан болатын. Сол жолы Рүстеміміз самолетте Ақботамен қатар отырып қалыпты. Сол әуедегі таныстық бүгін осындай қуанышты тойға айналып отыр…
Бірнеше жыл бұрын Рүстем бауырымызды “Ұлытау” тобына әкеліп, әуеде қалыңдығымен жолықтырып, екеуінің де ата-анасын қуанышқа бөлеп, бір-біріне құда-құдағи қылып, дүбірлі той жасатқан, самолеттегі таныстықты дүбірлі тойға айналдырған шебер Аллаға сансыз мадақ! Отан отбасынан басталады демекші, отбасын құрған екі жасқа бақыт-береке, шынайы маxаббат, үбірлі-шүбірлі болып, еліміздің ең үлгілі отбасы болуын шын жүрегіммен тілеймін! Тойларыңыз құтты болсын! Алла тіл-көзден сақтасын!” – дейді ол.
Болмановтан өзге, әнші Асхат Тарғын той қонақтары қатарынан табылды.
Ал Қарақат Әбілдина екі жасқа деген тілегін әлеуметтік желі арқылы жеткізген.