Абай ауданының ірге тасын қалаған, Шәкәрім қажының көзін көрген Кенжетілеу Доланбекұлының баласы Айдар Кенжетілеуұлы Абайдың екінші әйелі Әйгерімнің Бәтет Әзімханқызына сыйлаған қобдишасын музей қорына тапсырды. Бұл сыйлықтың иесі Бәтет апамыз – руы Жігітек, Бөжей ұрпағы екен, деп хабарлайды Baq.kz ақпарат агенттігі.

Кенжетілеуұлының айтуы бойынша, Бәтет Әзімханқызы Ырғызбай ауылына келін болып түседі. Бұрынғының салты бойынша, ағайын-туыс кезектесіп, есік кө рсету үшін жас келінді қонаққа шақырып отырған. Сонда Әйгерім келін болып түскен Бәтетті өз үйінен дәм таттырып, соңында осы қобдишаны сыйға тартқан. Онысы – «қуыс үйден құр шықпасын», игілікке бастаған ырым болсын дегені. Кенжетілеуұлының анасы Ақлия – Бәтет Әзімханқызының туған сіңілісі. 1967 жылы Бәтет апамыз қобдишаны Кенжетілеуұлының әйелі Бақытқа берген.

Міне, осылайша, Кенжетілеуұлы Әйгерім сыйға тартқан қобдишаны енді музей қорына тапсырды. Көненің көзі болған қобдиша музей қорында сақталып, жуық арада жұрт назарына ұсынылады.

Тағы да оқыңыз:

Мұхтар Әуезов ғашық болған Ғайыпжамал кім?

Қазақтың үш асыл ұлы бір әйелге ғашық болған

Қазақтың белгілі жазушысы Ілияс Есенберлин жарын қалай таңдаған?

Талқылау