Қайрат Нұртас 5D форматындағы концертінде әуеде қалықтап жүріп ән шырқады
12 желтоқсан күні «Астана-Арена» стадионында Қайрат Нұртас шығармашылығының 10-жылдығына орай әлемдік деңгейдегі «Ғашықпын…» атты ірі музыкалық шоу өтті.
Бұл кеш бұрынғы кештен өзгерек, деп хабарлайды Қайрат Нұртастың концертіне арнайы шақырту алған Stan.kz-тің Астанадағы тілшісі.
Қазақ шоу-бизнесінде алғаш рет әнші өзінің шығармашылық кешіне 20 мыңнан аса көрермен жинады. Аренаға жиналған көрерменді қоспағанда, миллиондаған халық теледидардан тікелей эфирде тамашалады.
Концерттің басты жаңалығы да Нюша қыздың қазақ тілінде ән айтқаны болды. Ресейлік жұлдыз Қайраттың репертуарындағы «Алматының түндері-ай» әнін ешқандай акцентсіз орындап шықты.
Мұны қазақ көрермені де жоғары бағалап, әлеуметтік желілерде жарыса жазуда. Қайраттың концертінде Ресейден Нюшадан басқа Тимати де өнер көрсеткен болатын.
Тимати да «Инстаграм» парақшасы арқылы бұл кештің ерекше болғанын атап өтті. Ал, оның оқырмандарынің бірі тіпті Қайраттың осынша көрермен жинағанына, «шок» болғанын жазған.
Сахнаға шыққан сайын өзінің даралығымен, сапалы жанды дауысымен, өзіндік мәнерімен есте қалатын Қайрат Нұртас бұл жолы да ерекшеленді. Өнерін бағалайтын көрерменге әдеттегі «3D форматтағы» концерт емес, 5D форматтағы шоу көрсетті.
«Шоуды әзірлеу ушін арнайы Мәскеуден кәсіби мамандар шақырылды. Ол шоудың режиссері – Григорий Скоморовский, қоюшы суретші – Ротислав Бирюков, жарық беру жөнінде суретші – Сергей Воронцев және т.б.», – деп мәлімдеді кештің жүргізушісі Ләйлә Сұлтанқызы.
Бағдарлама барысында әнші отандастары үшін өзінің үздік әндерін орындады. Еңбектеген баладан, еңкейген қартқа дейін қосыла шырқап, бұл күні стадионның іші ерекше күйге бөленді.
Сонымен қатар орындаушы кеңістікті де қолданып, әуеде қалғып жүрді. Бір сөзбен техниканың барлық мүмкіндіктерін пайдалана отырып, нағыз «шоу» жасай білді.