Ұлыбританияда тәртіп бұзған жастарды классикалық музыкамен тәрбиелемек: Бұған музыканттар қарсы шықты
Ұлыбританияның Ливерпуль қаласында билік тәртіп бұзатын жастарды тарату үшін көшелерде классикалық музыка қосқан. Өнерді қауіпсіздік құралына айналдырған шешім қызу пікірталас тудырған. Бұл туралы Stan.kz ақпарат агенттігі BBC-ге сілтеме жасап хабарлайды.
Ұлыбританияның Ливерпуль қаласында билік антиәлеуметтік мінез-құлықтың алдын алу үшін көшелерде классикалық музыка қосу тәжірибесін енгізді. Алайда бастама жергілікті музыканттар мен тұрғындардың сынына ұшырап отыр.
"Мен, жұмысшы табынан шыққан классикалық музыкант ретінде, бұл жағдайға қатты ашуландым. Өзімді дәл осындай музыкаға лайық емес адамдай сезіндім", – дейді скрипкашы Лора Макмиллан.
Лора Макмиллан классикалық музыканы "қару" ретінде пайдалануға қарсы.
"Классикалық музыка тек бай адамдарға арналған, әрі кейбіреулер үшін тым күрделі деген стереотип бұрыннан бар. Осындай түсінікті өз мақсаттарына пайдалануы өте жиіркенішті", – деді ол.
Қаланың кейбір аудандарында шам бағаналарына орнатылған динамиктерден қатты классикалық музыка қойылып, тәртіп бұзуға бейім жастардың топтасуын болдырмау қарастырылған. Іс-шараны жергілікті полиция мен қалалық кеңес бірлесіп жүзеге асырып отыр.
Ресми өкілдердің айтуынша, музыка жастардың жиналуын азайтып, құқықбұзушылықтың алдын алуға көмектесетін тиімді тәсіл. Полиция әдіс арқылы қоғамдық қауіпсіздікті күшейтіп, қала орталығын тұрғындар мен туристер үшін қауіпсіз етуді мақсат етеді.
Алайда шешім мәдени ортада үлкен дау туғызды. Классикалық музыканттар мұндай тәсіл өнерді "қару" ретінде пайдаланумен тең деп санайды. Олардың пікірінше, қоғамда "классикалық музыка тек ауқатты адамдарға арналған" деген ескі стереотипті одан әрі күшейтеді. Мәселен, жергілікті скрипкашы Лора Макмиллан осы жағдайға наразылық білдіріп, классикалық музыканың баршаға ортақ құндылық екенін атап өтті. Оның айтуынша, мұндай тәжірибе өнердің беделіне нұқсан келтіреді.
ОқыңызСонымен қатар кәсіп иелері де шағымданып жатыр. Олар бірдей бірнеше шығарманың қайта-қайта қойылуынан шаршағанын айтып отыр. Кейбір тұрғындар бастапқыда бұл музыканы қала имиджін көтеру үшін немесе мерекелік шаралар аясында қосылып жатыр деп ойлаған.
Тағы бір алаңдаушылық осы тәсілдің жанама әсерлері. Қатты музыка таңғы уақытта көшеде түнейтін адамдарға да кедергі келтіруі мүмкін. Дегенмен қала билігі мұндай әдіс үйсіздерді қуу үшін қолданылмайтынын мәлімдеді. Соған қарамастан, қоғамдық пікір екіге бөлінді. Бір тарап қауіпсіздік үшін мұндай шараны қолдаса, екінші тарап мәдени құндылықтарды бұлай пайдалануға қарсы.
Еске салайық, бұған дейін 2026 жылдың ең үздік қалаларының ресми рейтингі жарияланды. Time Out және Intrepid Travel жүргізген зерттеу нәтижесінде Ұлыбританияның екі қаласы әлемдегі ең үздік қалалардың алғашқы ондығына, тіпті алғашқы бестігіне енді. Рейтинг жергілікті тұрғындардың дауыс беруі негізінде жасалған. Биыл Time Out Best Cities рейтингі өзінің 10 жылдығын атап өтіп жатыр. Тізім әлемнің түкпір-түкпіріндегі 24 мыңнан астам қала тұрғынының пікірі мен Time Out сарапшыларының бағасына сүйеніп жасалған.
