Түркістанда зейнеткер дүкенде тұрған сөмкеден ақша ұрлап кеткен

Түркістанда дүкенге мата сатып алуға келген зейнеткер сөмкеден ақша ұрлап кеткен, деп хабарлайды Stan.kz ақпарат агенттігі.  

Қаржысының ұрланғаны туралы жергілікті тұрғын аррыз түсірген. Жәбірленуші әйелдің айтуынша, оның дүкен сөресінде тұрған сөмкесінен 180 мың теңге ақшасын белгісіз біреу ұрлап кеткен. Полиция қызметкерлері аталған жайтты Қылмыстық кодекстің 188-бабы (Ұрлық) бойынша тіркеді. Тәртіп сақшылары хабар алысымен оқиға орнына жедел жетті. Ұрлық жайты орын алған аймақтың барлығын жіті қарап, куәлардан жауап алды.

Дүкен ішіндегі бейнебақылау камераларын тексеріп, ақшаны жасырын ұрлаған күдіктіні байқады. Полицейлер осы бағыттағы жұмыстарды одан әрі жүргізіп, күдіктінің жеке басын анықтады. Ол Жамбыл облысының тұрғыны болып шықты. Полиция қызметкерлерінің атқарған тыңғылықты жұмыстарының нәтижесінде, күдікті зейнеткерді бір тәулік ішінде ұстады.

Айғақты зат ретінде қолды болған ақша тәркіленіп алынып, заңды иесіне қайтарылды. Белгілі болғандай, 65 жастағы зейнеткер дүкенге мата алу мақсатында келген. Содан соң айналасында адамдардың жоқтығын пайдаланып, сөмкедегі ақшаны алып кеткен.

Полиция қызметкерлері зейнеткердің бұрын сотты болғанын анықтады. Бүгінгі таңда егде жастағы әйел қамауға алынып, оған қатысты сотқа дейінгі тергеу амалдары жүргізілуде.