"Нан үшін кезекке тұрғанда қабырғасы сынды": Газа секторында қалып қойған қазақстандық әйел көмек сұрайды

Газа секторында тұратын Қазақстан азаматы Светлана Әбу-Зурейх елден көмек сұрап, оны алып кетуді сұрады. Ол күйеуі Мұхаммедпен және кәмелетке толмаған бес баласымен бірге сусыз, тамақсыз және дәрі-дәрмексіз өмір сүруге мәжбүр. Бұл туралы Stan.kz ақпарат агенттігі Orda.kz сайтына сілтеме жасап хабарлайды. 

Әйел жас кезінде палестиналық Мұхаммед Әбу-Зурейхпен отау құрған. Мұхаммед Алматы медициналық институтында оқыған, сол кезеңде екеуі танысқан екен.  24 жыл бұрын екеуі отауласып, Газаға көшіп келген. Олардың жеті баласы бар. Төрт баласы кәмелетке толмаған, ең кішісі сегіз жаста.

Бомбалаудың кесірінен олардың үйінен тек қирандылар қалды. Алғашқы күндерден бастап отбасы БҰҰ мектебінде паналайды. Олар кабинеттерге орналастырылды, олардың әрқайсысында 20-дан 70-ке дейін адам жата алады.

Мектепте су, жарық және газ жоқ. Нан мен су үшін олар сегіз сағат кезекте тұру керек.

"Су да, тамақ та, жарық та, электр де, газ да жоқ. Суды алу үшін күйеулеріміз оны мектептен тыс жерден іздеуі керек. Су іздеу үшін бастарын қауіпке тігеді, өйткені бұл жерде бомбалап жатыр. Нан үшін таңғы алтыда шығады да, жетіден тоғыз сағатқа дейін кезекте тұрады. Бүгін нанға кезекке тұрғанында күйеуімнің қабырғасы сынды. Отанымызға оралуға көмектесіңізші. Біз өз өміріміз үшін қатты қорқамыз. Мұнда ересектерді де, балаларды да аямайды", – деді Светлана.

Светлана мен оның үлкен қызының ғана Қазақстан азаматтығы бар, қалған балаларында Палестина паспорты бар.

Бұған дейін СІМ ресми өкілі Айбек Смадияров Газа секторында 67 қазақстандық бар екенін айтты. Ол әзірге азаматтарды алып кету мүмкін емес деп мәлімдеді.

"Египет тарапымен біздің азаматтарды, оның ішінде олардың Палестина азаматтығы бар жақын туыстарын эвакуациялау туралы келіссөздер жүргізілуде. Египет тарапының тиісті рұқсатын күтеміз", – Смадияров.