"Мені Қуандықтың әкесі ұрды": Бишімбаевтың бұрынғы әйелі экс-жұбайының көлігімді ұрлап кетті деген айыптауына жауап берді
Әйелін өлтірді деп айыпталған бұрынғы министр Қуандық Бишімбаевтың соты 15 сәуірде жалғасты. Айыпталушы сот отырысында бұрынғы әйелін көлігін ұрлап, бопсалады деп айыптады. Назым Қаһарман экс-жұбайының айыптауына өз жауабын берді. Бұл туралы Stan.kz ақпарат агенттігі хабарлайды.
Фото: nazymkakharman Instagram парақшасынан
Назым Қаһарман экс-жұбайы Нүкенованы өлтіргеннен кейін балалары үшін алаңдағанын, сол үшін Бишімбаевтың анасынан көлік сұрағанын жеткізді. Айтуынша, экс-министрдің шешесі түрлі сылтау айтып, бірде-бір көлікті бермеген.
“Кісі өлтірілгеннен кейін алғашқы күндерде балаларым үшін қатты уайымдадым. Олардың үнемі бақылап отырғым келді. Үшеуін де бірдей автобуспен жеткізе алмайтынымды біліп, Қуандықтың ата-анасынан көлік сұрадым. Себебі желіде түрлі жағымсыз пікірлер болды. Әрине мен ана болған соң қатты алаңдадым. Мені тек балаларымның жағдайы алаңдатты. Бишімбаевтың анасының сөзінше, барлық көліктер тергеу изоляторына зат тасу және адвокаттарды апару үшін керек. Бұл жерде бір ғана қорғаныс болуы керек еді – шын жүректен мойындау. Ал қазір цирк болып жатыр. Жалпы көлік беруден бас тартты. Ол немерелерім аман қалады деп жауап берді”, – деді Назым.
Сондай-ақ ол 11 қарашада Бишімбаевтың ата-анасымен арада жанжал болғанын айтты.
“Екеуміз ажырасқанда Қуандықтың мүлкі болмады. Бірақ мектептің ақшасын төлеп, қамқорлық жасап, барлығын реттейтін әке болды. Бірақ Қуандық адам өлтірген соң, балалардың жағдайы үшін, оның әкесіне барып, қаржы мәселесін көтердім. Қуандықтың әкесі мені саудагер деп атап, екі рет ұрды. Мұның бәрін қызым көрді”, – деді Назым.
Назымның айтуынша, қиын жағдай кезінде көмек қолын созған жалғыз адам Бақытжан Байжанов болған.
“Балаларға қолдау көрсеткен, әке жағынан жалғыз туысы – Бақытжан болды. Ол бізге өзіне тіркелген көлікті алып кетуді ұсынды. Сол кезде ол Қуандықты “мал екен” деп айтты. Көлікті балалар үшін алдым. Нәтижесінде мен ұры болып шықтым. Айтпақшы, Қуандықтың ата-анасының Алматыдағы пәтерінің құлпын қашан ауыстырғанын білмеймін. Жаңа жыл қарсаңында балаларым заттарын алуға барды да, ол жерде ешкім болмаған соң заттарын ала алмады”, – деді Назым Қаһарман.
Айта кетейік, бұған дейін Бишімбаев Салтанатқа үйленген соң оған көлік сыйлағанын айтты. Жазда ажырасқаннан кейін Байжановқа көлікті Алматыға апарып беруін өтінгенін жеткізді. Алайда ол көлікті Назым Қаһарман ұрлағанын, Байжанов екеуі оны түрмеге қаматып, мүлкін бөліп алғалы жатқанын айтып, экс-жарын айыптады.