"Легионерлерден тазартып жатқан тұңғыш министр": Спорт министрі Мырзабосынов өзін желіде мақтағанды қаламайтынын айтты
2 қыркүйекте Ербол Мырзабосынов туризм және спорт министрі қызметіне тағайындалғаннан кейін TikTok-та оны мақтаған көптеген видео пайда болды. Министрдің өзі мұндайды ұнатпайтынын мойындады. Бұл туралы Stan.kz ақпарат агенттігі хабарлайды.
Фото: Видеодан скрин
"Бұған қарсымын. Көрдім, достарым мен таныстарым жіберіп жатыр. Бірақ біз тіпті TikTok-қа да жаздық. Шектеу қойып жатырмыз", – деді министр мәжіліс отырысында.
Мырзабосынов министрлікке тағайындалмай тұрып, педагог болып жұмыс істегенін, жоғары оқу орындарында сабақ беріп, жаттықтырушы болғанын еске салды.
"Біздің ойымызша, бұл видеоларды көптеген шәкірттерімнің бірі жасап жатқан шығар", – деп болжады министр.
Әлеуметтік желіде көптеген оқырман оның қызметке келгеніне ризашылығын білдіріп, жүрекжарды тілектер жазды.
"Краш", "Патриот", "Спортшы, жаттықтырушы-ұстаз, министр", "Отандық спортты легионерлерден тазартып жатқан тұңғыш министр", "Ең қарапайым отбасыдан шыққан, нағыз қазақтың ер жүрек жігіті. Спортқа ғана емес, Қазақстан үшін еңбегі сіңетін батыр. Осындай азаматтарды қолдап, дүрыс тілеу тілейік ағайын. Бауырымыздың жүрегі қазақ!", "Жақсы істерден көрейік. Өте мықты жақсы жігіт", – деп жазды желі қолданушылары.
Еске салайық, бұған дейін мәжіліс отырысында туризм және спорт министрі Ербол Мырзабосынов Қазақстанда 120 спорт түріне қаржы бөлу тоқтайтынын мәлімдеді. Министр бұл мәселенің спорт саласындағы проблемалардың бірі екенін растады. Қаржы тек 60 спорт түріне берілетінін атап өтті. Оған ұлттық спорт, Олимпиада, Паралимпиада, Сурдлимпиада, Азия және Параазиялық ойындар бағдарламасына кіретін 45 спорт түрі кіреді деді ведомство басшысы.