Қызылордада алты айлық нәресте анасының көз алдында жанып кетті

Қызылорда қаласында түн жарымында тұтанған от, алты айлық нәрестенің өмірін жалмады. Көп балалы отбасы жалдап келген шағын баспана өртеніп кетті. Анасы 4 қызын терезеден шығарып үлгергенмен, бесіктегі бесіншісін шығара алмапты, деп хабарлайды Stan.kz ақпарат агенттігі "Астана" арнасына сілтеме жасап.

Өрт түнгі сағат бірлер шамасында болған. Үйде 27 жастағы анасы, бес қызымен ұйықтап жатқан. Ал отағасы жұмыс барасымен іссапарға кеткен. Жанұшыра айқайлаған дауысқа бірінші болып көршілер көмекке келген. Іштегі ана төрт баласын терезеден шығарып үлгергенмен, бесіктегі бөбегіне көмек бере алмапты.

"Барсақ өрт лаулап кетіпті, еге бермей. Бес қызы, күйеуі бар келіншек еді. Жағдайлары өздерінің тапқанын өздері пәтерге төлеп отырған балалар ғой. Баланы төртеуін алып шығып үлгерген. Біреуін шығара алмады. Іште қалған бала алты айлық бала, бесіктегі жатқан бала. Сол бесікті алуға шамасы келмей қалған", - деді көршісі Гүлзат Мерейова.

Қазір анасы мен кішкентай қыздар дәрігерлердің бақылауында. Ақ халаттылардың айтуынша, қауіп жоқ, дегенмен улану дерегі бар. Ал отанасының сол жақ білегі мен екі алақаны күйіп қалған.

 "Анасының таңертеңгі жағдайында психикалық өзгерістер болған болатын. Қазіргі таңда қанағаттанарлық болып есептеледі. Төрт бала 7, 8, 5 және 2 жастағы балалардың ішіндегі бес жасар баланың оң жақ тобығында екінші дәрежелі күйік анықталды. Бірақ мәлімет бойынша, қазіргі жағдайда қанағаттанарлық", - деді облыстық денсаулық сақтау басқармасының бөлім басшысы Бибізада Дүйсенбаева.

Бұл отбасы шағын баспананы жалдап келген. Көп балалы ретінде қала әкімдігінде үш жылдан бері пәтер кезегінде тұр. Әкімдік қазір тізімде 1230-шы болып тұрғанын айтты. Дегенмен шенділер орын алған жағдайға орай уақытша баспанамен қамтамасыз етуге уәде беріп отыр. Өртке оранған үйді де қалпына келтіріп бермек.

"Заңға сәйкес біз 6 айға дейін үй жалдап беруге дайынбыз. Одан бөлек, үйін қалпына келтіру мақсатында қаланың белсенді меценаттарымен келіссөздер жүргізіп қойдық. олар да көмектесуге дайын. Jдан бөлек, қаржылай, азық-түліктей, киімдей, барлық шараларды қарастырып отырмыз", - Қызылорда қаласы әкімінің орынбасары Елмұрат Рахматуллаев.

Бұл оқиға қызылордалықтарды да бей-жай қалдырмады. Қазір қоғам белсендірлері әлеуметтік желілер арқылы қаржы жинап бастады. Ал өрттің неден шыққандығы әзірге белгісіз. Мамандар, электр сымдарының қысқаша тұйықталуынан болуы мүмкін деген болжам жасап отыр.