Қаржы реттеушісі теңгенің құлдырауы аясында Қазақстан халқына мәлімдеме жасады
Теңгенің құнсыздануы және ресейлік банктердің қазақстандық еншілес ұйымдарына ішінара әсер еткен Ресейге қарсы жаңа санкциялар аясында қаржы нарығын реттеу және дамыту агенттігі қазақстандықтарға жүгінді, деп хабарлайды Stan.kz ақпарат агенттігі.
Ведомствоның мәліметінше, Қазақстанның банк жүйесіндегі жағдай тұрақты болып отыр. Банктердің үздіксіз жұмысын қамтамасыз ету үшін меншікті капиталдың және өтімділіктің айтарлықтай қоры бар.
"Банк секторының меншікті капиталы 4,6 трлн теңгені құрады. Банктердің меншікті капиталының жеткіліктілігі заңнамада белгіленген ең төменгі талаптардан 3 есеге жуық жоғары. Валюта бағамының ағымдағы құбылмалылығы банк секторының қаржылық тұрақтылығына әсер етпейді. Банк салымшылары ешқандай тәуекелге бармайды. Қазақстандықтардың банктердегі салымдарына заңнамаға сәйкес Қазақстанның депозиттерге кепілдік беру қоры кепілдік береді", – деп хабарлады ведомстводан.
Ведомствоның баспасөз қызметі қазақстандықтарды ақпарат саласындағы алып-қашпа әңгімелерге бой алдырмауға, сондай-ақ инвестициялық шешімдерге салмақты көзқараспен қарауға шақырды.
"Қор нарықтарындағы қазіргі өскен құбылмалылық сыртқы факторларға байланысты және алыпсатарлық болуы мүмкін. Агенттік қаржы тұтынушыларын жинақтарын сақтап қалу үшін сақтық танытуды сұрайды. Ағымдағы жағдайда ұшқыр әрекеттер қаржылық шығынға әкелуі мүмкін", – деп ескертті агенттік.