Ғалымдар коронавирустан кейін пайда болатын жаңа ауру түрі туралы ескертті
Коронавирус адамның жүрегіне инфаркт салдарына ұқсас құрылымдық өзгерістер қалдыруы мүмкін. Бұл туралы неміс ғалымдары ескертті, деп хабарлайды Stan.kz ақпарат агенттігі Daily Mail басылымына сілтеп.
Зерттеу барысында коронавирустан емделген 100 пациенттің 76-сының жүрегі зақымданған белгілі болды. Сонымен қатар, зерттеуге қатысушылардың 75 пайызы қандағы тропонин ақуызының жоғары деңгейіне жеткен, бұл әдетте жүрек соғысының көрсеткіші болып табылады.
Германияда жүргізілген екінші зерттеу коронавирустан қайтыс болған пациенттердің жартысынан көбінің жүрегіне COVID-19 әсер еткенін көрсетті. Ғалымдар коронавирустың салдары адамдарда инфаркт, инсульт немесе басқа жүрек-тамыр аурулары қауіпін қаншалықты арттыратынын әлі білмейді. Алайда, зерттеулер сауыққан пациенттер ұзақ уақыт бойы дененің әлсіздігінен арыла алмайтындығын көрсетті.
Сонымен қатар ғалымдар науқастар емделгеннен кейін де дәрігерлердің арнайы бақылауында болуы керек екенін ескертті. Олардың пікірінше, егер қосымша зерттеулердің нәтижелері ұқсас болса, онда коронавирус жүрек ауруының жаңа толқынын тудыруы мүмкін.