Бұған дейін экс-министрдің үйқамақта болу мерзімі 2021 жылдың 14 қарашасына дейін ұзартылған болатын. Біртановтың адвокаттары қарсы шығып, соттан бұлтартпау шарасын жеңілірек жазаға – ешқайда кетпеу туралы қолхат немесе кепілге ауыстыруды сұрады.

"Тергеу тобы жетекшісінің өтінішімен іс материалдарымен танысу кезеңінде күдікті Біртановты үйқамақта ұстау мерзімін созу ісі қаралды. 14 қыркүйекте тергеу соты мерзімді 14 қарашаға дейін ұзарту туралы шешім қабылдады. Бұған адвокаттар Сағалиев, Куряченко, Бейсекеев жеке шағым түсірді. Біз қазір осыны қарастырып жатырмыз",- деді судья Мұрат Солтыбаев.

Прокурор Жараспаев соттан Елжан Біртановтың үйқамақта болу мерзімін ұзарту туралы сот қаулысын өзгеріссіз қалдыруды, ал адвокаттар бұл шешімнің күшін жоюды сұрады.

Нұр-Сұлтан қаласы қылмыстық істер жөніндегі соттың сот алқасы судьясы Мұрат Солтыбаев Біртанов қорғаушыларының дәлелдерімен келіспей, күдіктіні үйқамақта қалдырды.

"Нұр-Сұлтан қаласы мамандандырылған ауданаралық тергеу сотының күдікті Біртановты қылмыстық іс материалдарымен танысу кезеңінде үйқамақта ұстау мерзімін екі айға ұзарту туралы 2021 жылғы 14 қыркүйектегі қаулысы өзгеріссіз қалдырылсын, адвокаттардың жеке шағымы қанағаттандырылмайды. Бұл соңғы шешім, кассациялық тәртіпте шағымдануға және наразылық білдіруге жатпайды", – деді судья Солтыбаев.

Біртанов: Ешқандай қиянат жасамағанымды дәлелдеу үшін басты сот ісін асыға күтемін

Денсаулық сақтау министрлігі Біртановтың ісі бойынша адвокатқа кедергі келтіргені үшін жазаланды

Айта кетсек, қаржылық мониторинг агенттігі бұрынғы денсаулық сақтау министрі Елжан Біртанов пен вице-министр Олжас Әбішевке қатысты сотқа дейінгі тергеуді аяқтағанын мәлімдеген. Біртанов пен Әбішев Денсаулық сақтау министрлігінің жарамсыз ақпараттандыру Платформасын қабылдау және пайдалануға беру арқылы лауазымдық өкілеттіктерін асыра пайдаланды деп күдіктелуде.

Талқылау